ఒడిశా, ఛత్తీస్గఢ్, గుజరాత్లలో అతి భారీ వర్షాలు.. మత్స్యకారులకు హెచ్చరిక
బంగాళాఖాతంలో ఏర్పడిన వాయుగుండం ప్రభావంతో సోమవారం నాడు ఒడిశా, ఛత్తీస్గఢ్, గంగానది పరివాహక పశ్చిమ బెంగాల్ ప్రాంతాల్లో అతి భారీ వర్షాలు కురవనున్నాయి.
దిశ, డైనమిక్ బ్యూరో: బంగాళాఖాతంలో ఏర్పడిన వాయుగుండం ప్రభావంతో సోమవారం (జూలై 27) నాడు ఒడిశా, ఛత్తీస్గఢ్, గంగానది పరివాహక పశ్చిమ బెంగాల్ ప్రాంతాల్లో అతి భారీ వర్షాలు కురవనున్నాయి. అలాగే గుజరాత్, హిమాలయ రాష్ట్రాల్లోనూ భారీ వర్షపాతం నమోదయ్యే అవకాశం ఉంది. అయితే, దేశ రాజధాని ఢిల్లీతో పాటు వాయువ్య భారతదేశంలో మాత్రం వాతావరణం సాపేక్షంగా పొడిగా ఉండనుందని భారత వాతావరణ శాఖ (IMD) తెలిపింది.
తీవ్రమైన వాయుగుండం..
సాగర్ దీవులకు (పశ్చిమ బెంగాల్) ఆగ్నేయంగా 130 కిలోమీటర్ల దూరంలో కేంద్రీకృతమైన మేఘాల సమూహం వాయుగుండంగా బలపడింది. రుతుపవన ద్రోణి తన సాధారణ స్థానం నుంచి దక్షిణం వైపుకు మారడం వల్ల ఉత్తర భారతదేశం కంటే మధ్య, తూర్పు భారతదేశంలో ఎక్కువ వర్షాలు కురవనున్నాయి. వాయుగుండం ప్రభావంతో ఒడిశాలో అత్యధిక వర్షపాతం నమోదు కానుంది. ఒడిశాతో పాటు పొరుగునే ఉన్న ఛత్తీస్గఢ్లోని పలు జిల్లాల్లో ఆకస్మిక వరదలు వచ్చే ప్రమాదం ఉందని ఐఎండీ మోస్తరు ప్రమాద హెచ్చరికలను జారీ చేసింది. అరేబియా సముద్రం నుంచి వీస్తున్న తేమ గాలుల కారణంగా గుజరాత్, సౌరాష్ట్ర, కచ్, కొంకణ్, గోవా, మధ్య మహారాష్ట్ర ప్రాంతాల్లో విస్తారంగా భారీ వర్షాలు కురుస్తాయి. కేరళ, తీరప్రాంత కర్ణాటకలలోనూ వర్షాలు పడతాయి.
మత్స్యకారులకు హెచ్చరిక..
ఢిల్లీ-ఎన్సిఆర్లో ఉదయం, రాత్రి వేళల్లో తేలికపాటి జల్లులు కురిసినప్పటికీ, పగటి ఉష్ణోగ్రతలు 30 డిగ్రీల సెల్సియస్కు పైనే ఉండి వాతావరణం పొడిగా ఉంటుంది. పంజాబ్, హర్యానా, పశ్చిమ రాజస్థాన్లలో కూడా వర్ష ప్రభావం చాలా తక్కువగా ఉంటుంది. కాగా, ఉత్తర బంగాళాఖాతంలో గంటకు 55 నుంచి 75 కిలోమీటర్ల వేగంతో ఈదురు గాలులు వీస్తాయని, సముద్రం అల్లకల్లోలంగా ఉంటుందని వాతావరణ శాఖ హెచ్చరించింది. కాబట్టి జూలై 29 వరకు మత్స్యకారులు సముద్రంలోకి చేపల వేటకు వెళ్లవద్దని స్పష్టమైన ఆదేశాలు జారీ చేసింది.
