త్వరలో 40 కోట్ల మంది ఓటర్ల జాబితా ప్రక్షాళన.. 22 రాష్ట్రాలు, కేంద్రపాలిత ప్రాంతాల్లో మూడవ దశ 'SIR'

దిశ, వెబ్‌డెస్క్: దేశవ్యాప్తంగా ఓటర్ల జాబితాలోని అవకతవకలను తొలగించి, జాబితాను పారదర్శకంగా మార్చేందుకు ఎన్నికల సంఘం (EC) సిద్ధమైంది. రాబోయే కొద్దిరోజుల్లో 'ఓటర్ల జాబితా ప్రత్యేక నిశిత సవరణ' (Special Intensive Revision - SIR) మూడవ దశను ప్రారంభించనున్నట్లు అధికారులు సోమవారం వెల్లడించారు. ఈ దశలో 17 రాష్ట్రాలు మరియు 5 కేంద్రపాలిత ప్రాంతాల్లోని సుమారు 40 కోట్ల మంది ఓటర్లను కవర్ చేయనున్నారు. వాస్తవానికి ఈ ప్రక్రియ ఏప్రిల్‌లోనే ప్రారంభం కావాల్సి ఉంది. అయితే కేరళ, అస్సాం, పుదుచ్చేరి, తమిళనాడు మరియు పశ్చిమ బెంగాల్ అసెంబ్లీ ఎన్నికల కారణంగా ఈ కార్యక్రమాన్ని తాత్కాలికంగా నిలిపివేశారు. ప్రస్తుతం ఎన్నికల ప్రక్రియ పూర్తి కావడంతో, తదుపరి దశను పట్టాలెక్కించేందుకు ఈసీ సమాయత్తమవుతోంది. ఢిల్లీ సహా ఆంధ్రప్రదేశ్, తెలంగాణ, కర్ణాటక, మహారాష్ట్ర వంటి మిగిలిన 22 రాష్ట్రాలు/యూటీల ఎన్నికల అధికారులకు ఇప్పటికే సన్నాహక పనులు పూర్తి చేయాలని ఈసీ ఆదేశాలు జారీ చేసింది.

60 కోట్ల మంది ప్రక్షాళన పూర్తి

దేశంలోని మొత్తం 99 కోట్ల మంది ఓటర్లలో ఇప్పటికే 60 కోట్ల మందికి సంబంధించిన సవరణ ప్రక్రియ పూర్తయ్యింది. ఇప్పటి వరకు ఉత్తరప్రదేశ్, పశ్చిమ బెంగాల్, తమిళనాడు, రాజస్థాన్, ఛత్తీస్‌గఢ్, గుజరాత్ వంటి 10 రాష్ట్రాలు,3 కేంద్రపాలిత ప్రాంతాల్లో ఈ కార్యక్రమాన్ని నిర్వహించారు. అస్సాంలోనూ ప్రత్యేక సవరణ పూర్తయ్యింది.

ప్రతిపక్షాల ఆందోళన - న్యాయ పోరాటం

ఈ ప్రక్షాళన ప్రక్రియపై రాజకీయ దుమారం కూడా రేగింది. పశ్చిమ బెంగాల్ మాజీ ముఖ్యమంత్రి మమతా బెనర్జీ స్వయంగా సుప్రీంకోర్టును ఆశ్రయించి ఈ ప్రక్రియను వ్యతిరేకించారు. బీహార్ వంటి రాష్ట్రాల్లోనూ రాజకీయ పార్టీలు కోర్టు మెట్లెక్కాయి. బంగ్లాదేశ్, నేపాల్, మయన్మార్ వంటి దేశాలకు చెందిన వారు ఓటర్ల జాబితాలో ఉన్నారని అధికారులు చెబుతున్నా, ప్రతిపక్షాలు మాత్రం ఇది బీజేపీకి వ్యతిరేకంగా ఉన్న ఓటర్లను లక్ష్యంగా చేసుకునే కుట్ర అని ఆరోపిస్తున్నాయి.

5 కోట్ల మంది ఓటర్ల తొలగింపు

రెండవ దశలో భాగంగా 12 రాష్ట్రాలు/యూటీలలో చేపట్టిన సవరణలో దిగ్భ్రాంతికర విషయాలు వెలుగులోకి వచ్చాయి. ఓటర్ల జాబితాలో సుమారు 10.2 శాతం కోత పడింది. అంటే, ప్రక్షాళనకు ముందు 50.99 కోట్లుగా ఉన్న ఓటర్ల సంఖ్య, సవరణ తర్వాత 45.81 కోట్లకు చేరింది. సుమారు 5.18 కోట్ల మంది ఓటర్ల పేర్లను జాబితా నుండి తొలగించారు. ఇందులో 60 లక్షల మందికి పైగా మరణించిన వారు ఉన్నట్లు అధికారులు గణాంకాలతో వెల్లడించారు. ఈ మూడవ దశ కూడా పూర్తయితే, దేశవ్యాప్తంగా ఓటర్ల జాబితా అత్యంత పారదర్శకంగా మారుతుందని ఎన్నికల సంఘం భావిస్తోంది.