దేశవ్యాప్తంగా ఈడీ సోదాలు.. వేదాంత గ్రూప్ పైనే ఫోకస్

దిశ, వెబ్‌డెస్క్: ప్రముఖ పారిశ్రామికవేత్త అనిల్ అగర్వాల్ నేతృత్వంలోని మల్టీనేషనల్ మైనింగ్ దిగ్గజం 'వేదాంత గ్రూప్' కార్యాలయాలపై ఎన్‌ఫోర్స్‌మెంట్ డైరెక్టరేట్ (ED) సోదాలు నిర్వహిస్తోంది. ఫారిన్ ఎక్స్ఛేంజ్ మేనేజ్‌మెంట్ యాక్ట్ (FEMA) ఉల్లంఘనల కేసులో భాగంగా వేదాంత గ్రూప్‌నకు చెందిన దిల్లీ, రాజస్థాన్, ముంబై సహా పలు ప్రాంతాల్లోని కార్పొరేట్ కార్యాలయాలపై ఈడీ అధికారులు ఏకకాలంలో తనిఖీలు చేపట్టారు. విదేశీ మారకద్రవ్య లావాదేవీలలో అక్రమాలు జరిగాయన్న ఆరోపణలపై కేంద్ర దర్యాప్తు సంస్థ ఈ విచారణ ప్రారంభించింది. సుమారు రూ.1,500 కోట్ల విలువైన క్రాస్-బోర్డర్ ఆర్థిక లావాదేవీలు, నిధుల మళ్లింపుపై ఈడీ ప్రధానంగా దృష్టి సారించినట్లు సమాచారం.

రాయల్టీ చెల్లింపులపైనే అనుమానాలు

జాతీయ మీడియాలో పేర్కొన్న వివరాల ప్రకారం.. వేదాంత లిమిటెడ్ తన మాతృ సంస్థ అయిన 'వేదాంత రిసోర్సెస్'కు చెల్లించిన రాయల్టీ నిధులకు సంబంధించి ఈ సోదాలు జరుగుతున్నట్లు తెలుస్తోంది. వేదాంత గ్రూప్ తన వ్యాపారాన్ని 6 స్వతంత్ర లిస్టెడ్ కంపెనీలుగా విభజించే (డీమెర్జర్) భారీ ప్రణాళికకు రుణదాతల నుండి ఆమోదం పొందిన నెల రోజుల లోపే ఈ ఈడీ దాడులు జరగడం గమనార్హం. ఈ దాడులపై వేదాంత గ్రూప్ ప్రతినిధి స్పందిస్తూ.. "మేము దర్యాప్తు అధికారులకు పూర్తిస్థాయిలో సహకరిస్తున్నాము. వారు కోరిన అన్ని వివరాలను అందిస్తున్నాము. చట్టాలకు లోబడి పనిచేసేందుకు మా సంస్థ కట్టుబడి ఉంది. ప్రస్తుతం విచారణ ప్రాసెస్ సాగుతున్నందున దీనిపై మరిన్ని వివరాలు వెల్లడించలేము" అని తెలిపారు.

ఈ 'FEMA' కేసే కాకుండా, వేదాంత గ్రూప్ ఇటీవల కాలంలో మరికొన్ని తీవ్రమైన వివాదాల్లో చిక్కుకుంది. నిషేధిత ఎలక్టోరల్ బాండ్ల ద్వారా వేదాంత గ్రూప్ రూ.400 కోట్లకు పైగా విరాళాలు ఇచ్చింది. ఇందులో సింహభాగం బీజేపీకి (సుమారు రూ.230 కోట్లు) దక్కగా.. కాంగ్రెస్‌కు రూ.125 కోట్లు, బీజూ జనతా దళ్ (BJD)కు రూ.40 కోట్లకు పైగా, జేఎంఎం (JMM)కు రూ.5 కోట్లు, తృణమూల్ కాంగ్రెస్‌కు రూ.20 లక్షలు ఇచ్చింది.

ఛత్తీస్‌గఢ్‌లోని వేదాంత పవర్ ప్లాంట్‌లో జరిగిన బాయిలర్ పేలుడులో 20 మందికి పైగా కార్మికులు ప్రాణాలు కోల్పోయారు. ఈ ప్రమాదానికి సంబంధించి అనిల్ అగర్వాల్‌తో సహా సంస్థ టాప్ మేనేజ్‌మెంట్‌పై పోలీస్ స్టేషన్‌లో ఎఫ్‌ఐఆర్ (FIR) నమోదైంది. ఒడిశాలోని భేడెన్ నది/కాలువ నుండి ఎలాంటి అనుమతులు లేకుండా నీటిని తరలించినందుకు గాను వేదాంత అల్యూమినియం సంస్థపై అక్కడి నీటిపారుదల శాఖ ఏకంగా రూ.233.11 కోట్ల భారీ జరిమానా విధించింది.