2024-25 లో కాంగ్రెస్ పార్టీకి ₹517 కోట్లకు పైగా విరాళాలు

దిశ, వెబ్ డెస్క్: భారతదేశంలో ప్రతిపక్షంలో ఉన్న కాంగ్రెస్ పార్టీ (Congress party) కి భారీగా విరాళాలు అందుతున్నాయి. 2024-25 ఆర్థిక సంవత్సరంలో ఏకంగా ₹517 కోట్లకు పైగా విరాళాలను అందుకుంది. ఎన్నికల సంఘం (EC) ప్రజల కోసం అందుబాటులో ఉంచిన కాంగ్రెస్ పార్టీ విరాళాల నివేదిక ప్రకారం.. 2023-24లో కాంగ్రెస్ అందుకున్న ₹281.48 కోట్లతో పోలిస్తే, ఈ ఏడాది విరాళాలు దాదాపు రెట్టింపు అయ్యాయి. సుప్రీంకోర్టు ఎలక్టోరల్ బాండ్లను రద్దు చేసిన తర్వాత, ఈ పూర్తి సంవత్సరంలో అందిన నిధుల విషయంలో కాంగ్రెస్ అగ్రస్థానంలో నిలిచింది. ఈ మొత్తం నిధులలో, ₹313 కోట్లు వివిధ ఎలక్టోరల్ ట్రస్టుల ద్వారా లభించాయి. ముఖ్యంగా, ప్రూడెంట్ ఎలక్టోరల్ ట్రస్ట్ నుంచి ₹216.33 కోట్లు, ప్రోగ్రెసివ్ ఎలక్టోరల్ ట్రస్ట్ నుంచి ₹77.34 కోట్లు మరియు ఏబీ జనరల్ ఎలక్టోరల్ ట్రస్ట్ నుంచి ₹15 కోట్లు అందినట్లు నివేదికలు చెబుతున్నాయి.

ఈ విరాళాలు ఇచ్చిన కార్పొరేట్ సంస్థలలో ఐటీసీ లిమిటెడ్ (₹6 కోట్లు), వేదాంత గ్రూప్‌కు చెందిన హిందుస్థాన్ జింక్ లిమిటెడ్ (₹10 కోట్లు), మరియు సెంచరీ ప్లైవుడ్స్ (ఇండియా) లిమిటెడ్ వంటి ప్రముఖ సంస్థలు ఉన్నాయి. అంతేకాకుండా, కాంగ్రెస్ పార్టీ సీనియర్ నేత, మాజీ కేంద్ర మంత్రి పి. చిదంబరం వ్యక్తిగతంగా పార్టీకి ₹3 కోట్లు విరాళంగా అందించగా, కర్ణాటక ముఖ్యమంత్రి సిద్ధరామయ్య, రాహుల్ గాంధీ, ప్రియాంక గాంధీ వాద్రా వంటి ఇతర నేతలు కూడా విరాళాలు ఇచ్చారు. ఎన్నికలు జరగనున్న తరుణంలో కాంగ్రెస్ పార్టీకి అందిన ఈ భారీ విరాళాలు రాజకీయ వర్గాల్లో చర్చనీయాంశమయ్యాయి.