చికున్‌ గున్యాపై గోమూత్రం అద్భుత ప్రభావం.. ఐఐటీ రూర్కీ అధ్యయనంలో కీలక విషయాలు

దిశ, డైనమిక్ బ్యూరో: దోమల ద్వారా వ్యాపించే తీవ్రమైన ‘చికున్‌ గున్యా’ (Chikungunya) వ్యాధికి చెక్ పెట్టడంలో ఆయుర్వేద గోమూత్రం (Cow Urine Distillate - CUD) అద్భుతంగా పనిచేస్తుందని ఇండియన్ ఇన్‌స్టిట్యూట్ ఆఫ్ టెక్నాలజీ, రూర్కీ (IIT Roorkee) శాస్త్రవేత్తల తాజా అధ్యయనంలో వెల్లడైంది. సంప్రదాయ ఆయుర్వేద విజ్ఞానాన్ని, ఆధునిక వైరాలజీని మేళవించి చేసిన ఈ పరిశోధన భవిష్యత్తులో చవకైన యాంటీవైరల్ మందుల తయారీకి కొత్త మార్గాలను అన్వేషించింది.

వైరస్ తీవ్రతలో భారీ తగ్గింపు

సురక్షితమైన మోతాదులో గోమూత్రాన్ని (Gau mutra ark) వినియోగించినప్పుడు చికున్‌ గున్యా వైరస్ స్థాయిలు 90 శాతానికి పైగా తగ్గినట్లు ప్రయోగాల్లో తేలింది. గోమూత్రానికి ‘థైమోక్వినోన్’ (నల్ల జీలకర్ర సారం), ‘పిపెరిన్’ (నల్ల మిరియాల సారం) కలిపి రూపొందించిన ప్రత్యేక మిశ్రమం ద్వారా ప్రయోగశాల వాతావరణంలో వైరస్ లోడ్‌ను ఏకంగా 99.85 శాతం మేర విజయవంతంగా తగ్గించారు. గోమూత్రంలో ఉండే బెంజోయిక్ యాసిడ్, హిప్పూరిక్ యాసిడ్, ఒలీక్ యాసిడ్ వంటి బయోయాక్టివ్ సమ్మేళనాలు వైరస్ రెప్లికేషన్ (శరీరంలో వైరస్ వృద్ధి చెందడాన్ని) సమర్థవంతంగా అడ్డుకుంటున్నట్లు పరిశోధకులు గుర్తించారు.

ఆధునిక వైద్యానికి ఆయుర్వేద జోడింపు

ఐఐటీ రూర్కీ బయోసైన్సెస్ అండ్ బయో ఇంజనీరింగ్ విభాగానికి చెందిన ప్రొఫెసర్ శైలీ తోమర్ నేతృత్వంలో జరిగిన ఈ పరిశోధన వివరాలు ప్రతిష్టాత్మక ‘ఏసీఎస్ అగ్రికల్చరల్ సైన్స్ అండ్ టెక్నాలజీ’ జర్నల్‌లో ప్రచురితమయ్యాయి. కేంద్ర ఆయుష్ (AYUSH) మంత్రిత్వ శాఖ మద్దతుతో దేశవ్యాప్తంగా ఉన్న పలు ఆయుర్వేద, బయోమెడికల్ సంస్థల భాగస్వామ్యంతో ఈ అధ్యయనం కొనసాగింది. ఈ పరిశోధన ప్రాముఖ్యత గురించి ఐఐటీ రూర్కీ డైరెక్టర్ ప్రొఫెసర్ కమల్ కిషోర్ పంత్ మాట్లాడుతూ.. ‘ప్రస్తుతం చికున్‌ గున్యాకు సరైన యాంటీవైరల్ చికిత్సలు పరిమితంగానే అందుబాటులో ఉన్నాయి. ప్రపంచ ఆరోగ్య సవాళ్లను ఎదుర్కోవడానికి ప్రాచీన విజ్ఞాన వ్యవస్థలను, ఆధునిక బయోటెక్నాలజీని అనుసంధానించడంలో ఐఐటీ రూర్కీ నిబద్ధతకు ఈ పరిశోధనే నిదర్శనం’ అని పేర్కొన్నారు. భవిష్యత్తులో రాబోయే తరహా యాంటీవైరల్ వ్యూహాలను అభివృద్ధి చేయడానికి ఈ అధ్యయనం బలమైన పునాదిని అందిస్తుందని ప్రొఫెసర్ శైలీ తోమర్ స్పష్టం చేశారు.