ఎన్ఐఏ చీఫ్ సదానంద్ దాతేపై కేంద్ర ప్రభుత్వం కీలక నిర్ణయం

దిశ, వెబ్ డెస్క్: జాతీయ దర్యాప్తు సంస్థ (NIA) డైరెక్టర్ జనరల్, 1990 బ్యాచ్ సీనియర్ ఐపీఎస్ అధికారి సదానంద్ వసంత్ దాతేను ఆయన మాతృ కేడర్ అయిన మహారాష్ట్రకు వెనక్కి పంపేందుకు కేంద్ర ప్రభుత్వం పచ్చజెండా ఊపింది. ఈ మేరకు హోం మంత్రిత్వ శాఖ పంపిన 'ప్రిమెచ్యూర్ రిపాట్రియేషన్' ప్రతిపాదనను ప్రధాని మోదీ నేతృత్వంలోని కేంద్ర నియామక కమిటీ (ACC) ఆమోదించింది. ప్రస్తుతం మహారాష్ట్ర డీజీపీగా ఉన్న రష్మీ శుక్లా పదవీ కాలం ఈ ఏడాది డిసెంబర్ 31తో ముగియనుండటంతో, తదుపరి రాష్ట్ర పోలీసు బాస్ (DGP)గా దాతేను నియమించాలని మహారాష్ట్ర ప్రభుత్వం కోరిన నేపథ్యంలో ఈ నిర్ణయం తీసుకున్నారు.

సదానంద్ దాతే కేవలం ఉన్నతాధికారి మాత్రమే కాదు. 2008 ముంబై ఉగ్రదాడుల సమయంలో కమా ఆసుపత్రిలో ఉగ్రవాదులను ప్రాణాలకు తెగించి ఎదుర్కొన్న ధైర్యశాలి. ఆ సాహసానికి గుర్తింపుగా ఆయన ‘ప్రెసిడెంట్స్ పోలీస్ మెడల్ ఫర్ గ్యాలంట్రీ’ని అందుకున్నారు. ఏప్రిల్ 2024లో ఎన్ఐఏ చీఫ్‌గా బాధ్యతలు చేపట్టిన ఆయన, వాస్తవానికి 2026 డిసెంబర్ వరకు ఆ పదవిలో ఉండాల్సి ఉంది. అయితే, రాష్ట్ర అవసరాల దృష్ట్యా ఏడాది ముందుగానే కేంద్రం ఆయనను విముక్తి చేయడంతో, త్వరలోనే ఆయన మహారాష్ట్ర డీజీపీగా పగ్గాలు చేపట్టే అవకాశం ఉంది.