సిబిఎస్ఈ 10వ తరగతి రెండోదశ పరీక్షల షెడ్యూల్ విడుదల

దిశ, వెబ్ డెస్క్: సెంట్రల్ బోర్డ్ ఆఫ్ సెకండరీ ఎడ్యుకేషన్ (CBSE) పదో తరగతి విద్యార్థుల కోసం రెండో దశ బోర్డు పరీక్షల కాలపట్టికను విడుదల చేసింది. ఈ ఏడాది నుండి అమల్లోకి వచ్చిన ఏడాదికి రెండుసార్లు బోర్డు పరీక్షలు విధానంలో భాగంగా.. మే 15 నుంచి ఈ పరీక్షలు ప్రారంభం కానున్నాయి. మొదటి దశ పరీక్షల్లో తమ మార్కులపై సంతృప్తి చెందని విద్యార్థులకు తమ స్కోర్‌ను మెరుగుపరుచుకోవడానికి బోర్డు ఈ అదనపు అవకాశాన్ని కల్పిస్తోంది. అయితే.. ఈ రెండో దశ పరీక్షలకు హాజరుకావడం విద్యార్థులకు పూర్తిగా ఆప్షనల్.

సిబిఎస్ఈ ప్రకటించిన షెడ్యూల్ ప్రకారం.. మే 15 నుంచి మే 21 వరకు ఈ పరీక్షలు జరుగుతాయి. మెజారిటీ పేపర్లు ఉదయం 10.30 గంటల నుండి మధ్యాహ్నం 1.30 గంటల వరకు జరుగుతాయి. కొన్ని ఎంపిక చేసిన సబ్జెక్టులు మాత్రం మధ్యాహ్నం 12.30 గంటలకే ముగుస్తాయి. మొదటి రోజు మే 15న మ్యాథమెటిక్స్ (స్టాండర్డ్ అండ్ బేసిక్) పరీక్షతో ఈ విడత ప్రారంభం కానుంది. మే 16న ఇంగ్లీష్ (కమ్యూనికేటివ్ లాంగ్వేజ్ & లిటరేచర్) పరీక్ష నిర్వహించనున్నారు.

మిగిలిన ప్రధాన సబ్జెక్టుల విషయానికొస్తే.. మే 18న సైన్స్, మే 21న సోషల్ సైన్స్ పరీక్షలు జరుగుతాయి. హిందీ, తెలుగు, ఉర్దూ, తమిళం వంటి భాషా పేపర్లన్నీ మే 19న నిర్వహించనున్నారు. మే 20వ తేదీన పెయింటింగ్, సంస్కృతం, ఇన్ఫర్మేషన్ టెక్నాలజీ (IT), ఆర్టిఫిషియల్ ఇంటెలిజెన్స్ (AI) వంటి సబ్జెక్టులకు పరీక్షలు జరుగుతాయని బోర్డు విడుదల చేసిన ప్రకటనలో పేర్కొంది. విదేశీ భాషలు, హోమ్ సైన్స్, రిటైల్, టూరిజం వంటి ఇతర సబ్జెక్టులకు కూడా నిర్ణీత షెడ్యూల్ ప్రకారం పరీక్షలు జరుగుతాయి. విద్యార్థులు తమ మార్కులను మెరుగుపరుచుకునేందుకు ఇదొక మంచి అవకాశమని విద్యా నిపుణులు భావిస్తున్నారు.

మెరుగుపడిన ఫలితాలు

ఇటీవలే విడుదలైన మొదటి విడత ఫలితాల్లో విద్యార్థులు ఘనవిజయం సాధించారు. 2026లో మొత్తం 24,83,479 మంది విద్యార్థులు రిజిస్టర్ చేసుకోగా, 24,71,777 మంది పరీక్షకు హాజరయ్యారు. వీరిలో 23,16,008 మంది ఉత్తీర్ణత సాధించడంతో మొత్తం ఉత్తీర్ణత శాతం 93.70గా నమోదైంది. గత ఏడాదితో (93.66%) పోలిస్తే ఇది స్వల్ప వృద్ధిని కనబరిచింది. గణాంకాల ప్రకారం 55,368 మంది విద్యార్థులు 95% పైగా మార్కులు సాధించగా, 2.21 లక్షల మందికి పైగా విద్యార్థులు 90% పైగా మార్కులతో ఉత్తీర్ణులయ్యారు.

రెండో దశ పరీక్షలకు హాజరయ్యే విద్యార్థులు తమ అడ్మిట్ కార్డ్‌ను (Admit Card) తప్పనిసరిగా వెంట తెచ్చుకోవాలని బోర్డు ఆదేశించింది. పరీక్ష కేంద్రాలకు నిర్ణీత సమయానికి చేరుకోవాలని మరియు ప్రిపరేషన్‌ను ముందుగానే పూర్తి చేసుకోవాలని సూచించింది. ఒకే విద్యా సంవత్సరంలో రెండుసార్లు పరీక్షలు రాసే వీలుండటం వల్ల విద్యార్థులపై ఒత్తిడి తగ్గి, మార్కులు మెరుగుపరుచుకునే అవకాశం కలుగుతుందని విద్యా నిపుణులు పేర్కొంటున్నారు.