West Bengal: పశ్చిమ బెంగాల్లో ‘ఝల్ మురి’ విందు! దీదీకి బీజేపీ ఘాటైన కౌంటర్
ఈ చారిత్రక విజయానందంలో బీజేపీ శ్రేణులు సంబరాల్లో మునిగితేలుతున్నారు. ఎటు చూసినా కాషాయ రెపరెపలు, ఎగురుతున్న గులాల్ రంగుల మధ్య.. కమలనాథులు ‘ఝల్ మురి’ తింటూ తమ సంబరాలకు మరింత ఉత్సాహాన్ని జోడిస్తున్నారు.
దిశ, డైనమిక్ బ్యూరో: పశ్చిమ బెంగాల్ అసెంబ్లీ ఎన్నికల ఫలితాల్లో భారతీయ జనతా పార్టీ (బీజేపీ) ప్రభంజనం సృష్టిస్తోంది. అధికార తృణమూల్ కాంగ్రెస్ (టీఎంసీ)కు కోలుకోలేని దెబ్బ కొడుతూ భారీ విజయం దిశగా కాషాయ దళం దూసుకెళ్తోంది. ఈ చారిత్రక విజయానందంలో బీజేపీ శ్రేణులు సంబరాల్లో మునిగితేలుతున్నారు. ఎటు చూసినా కాషాయ రెపరెపలు, ఎగురుతున్న గులాల్ రంగుల మధ్య.. కమలనాథులు ‘ఝల్ మురి’ (Jhal Muri) తింటూ తమ సంబరాలకు మరింత ఉత్సాహాన్ని జోడిస్తున్నారు.
నాడు మోడీ ‘ఝల్ మురి’.. మమత విమర్శలు
ఇటీవల అసెంబ్లీ ఎన్నికల ప్రచారంలో భాగంగా ప్రధాని నరేంద్ర మోడీ ఝార్గ్రామ్లో పర్యటించారు. ఆ సమయంలో ఆయన రోడ్డు పక్కన ఉన్న ఓ చిన్న షాపు వద్ద ఆగి, సాధారణ కస్టమర్లా రూ.10 నోటు ఇచ్చి బెంగాల్ ఫేమస్ స్ట్రీట్ ఫుడ్ ‘ఝల్ మురి’ కొనుక్కుని తిన్నారు. ఇందుకు సంబంధించిన వీడియో సోషల్ మీడియాలో విపరీతంగా వైరల్ అయింది. అయితే, ముఖ్యమంత్రి మమతా బెనర్జీ ఈ ఘటనను అప్పట్లో తీవ్రంగా తప్పుబట్టారు. ప్రధాని ఝల్ మురి తినడాన్ని ఒక ‘స్క్రిప్టెడ్ డ్రామా’గా ఆమె అభివర్ణించారు. అక్కడ ముందే కెమెరాలు ఉంచడం, మోడీ కచ్చితంగా రూ.10 నోటు తీసి ఇవ్వడంపై ఆమె పలు అనుమానాలు వ్యక్తం చేస్తూ విమర్శలు గుప్పించారు.
దీదీకి ఘాటైన కౌంటర్.. అంబరాన్నంటిన సంబరాలు
తాజాగా ఓట్ల లెక్కింపులో వెలువడుతున్న ట్రెండ్స్ ప్రకారం బెంగాల్లో బీజేపీ తన సత్తా చాటింది. ఈ అద్భుత విజయంతో పార్టీ కార్యకర్తలు, నాయకుల్లో ఎనలేని ఉత్సాహం నెలకొంది. రాష్ట్రవ్యాప్తంగా పండుగ వాతావరణం కనిపిస్తోంది. ఈ విజయోత్సవాల్లో భాగంగా పార్టీ శ్రేణులకు బీజేపీ ప్రత్యేకంగా ‘ఝల్ మురి’ని అల్పాహారంగా వడ్డించింది. గతంలో మమతా బెనర్జీ చేసిన ‘స్క్రిప్టెడ్ డ్రామా’ వ్యాఖ్యలకు ప్రాక్టికల్గా, అదే ఝల్ మురితో అదిరిపోయే కౌంటర్ ఇచ్చినట్లయింది. ఒకవైపు కాషాయ రంగుల కోలాహలం, మరోవైపు ఝల్ మురి రుచులతో బీజేపీ గెలుపు సంబరాలు బెంగాల్లో అంబరాన్నంటుతున్నాయి.
