పైలట్ల కొరతపై విమానయాన సంస్థల నిర్లక్ష్యం.. ALPA తీవ్ర ఆందోళన

దిశ, వెబ్ డెస్క్: భారతదేశంలో ఇటీవల పెద్ద సంఖ్యలో విమానాలు రద్దు అవుతున్న విషయం తెలిసిందే. దీనికి కొత్త ఫ్లైట్ డ్యూటీ టైం లిమిట్ (FDTL) నిబంధనలను కారణం చూపిస్తున్నారు. కొత్త రూల్స్ కారణంగా పైలట్ల కొరత ఏర్పడిందని చెబుతూ ఇటీవల పెద్ద సంఖ్యలో విమానాలు రద్దు అవుతున్న పరిస్థితి, విమానయాన సంస్థల నిర్వహణ సామర్థ్యం, పౌర విమానయాన నియంత్రణ సంస్థ DGCA పర్యవేక్షణపై అనేక ప్రశ్నలు లేవనెత్తింది. విమానయాన సంస్థలలో ప్రస్తుతం ఉన్న పైలట్ల కొరత సరైన ప్రణాళిక లేకపోవడం వల్ల, వాణిజ్య లాభాల కోసం DGCA నిబంధనలను సడలించాలని ఒత్తిడి తెచ్చేందుకు వేసిన వ్యూహాత్మక ఎత్తుగడ వల్ల అనేది ప్రధాన ప్రశ్నగా మారింది.

దీనికి అనేక అంశాలు కారణమై ఉండవచ్చు, కానీ కీలక విమానయాన సంస్థలు ముందుచూపుతో వనరుల ప్రణాళిక (Proactive Resource Planning) చేయడంలో విఫలం కావడం దీనికి ప్రధాన కారణమని విశ్లేషకులు భావిస్తున్నారు. ఈ పరిస్థితిపై ఎయిర్‌లైన్ పైలట్స్ అసోసియేషన్ ఆఫ్ ఇండియా (ALPA India) తీవ్ర ఆందోళన వ్యక్తం చేసింది. ఫాటిగ్ రిస్క్ మేనేజ్‌మెంట్ సిస్టమ్ (FRMS) భావనకు అనుగుణంగా, విమానయాన సంస్థలు తమ విమాన షెడ్యూళ్లను ఆమోదించే ముందు, అందుబాటులో ఉన్న పైలట్ల సంఖ్య సరిపోతుందో లేదో DGCA క్రియాశీలకంగా పరిగణించాలని ALPA ఇండియా కోరింది. పైలట్ల అలసటను నివారించి, ప్రయాణీకుల భద్రతను పెంచేందుకు ఉద్దేశించిన FDTL నిబంధనలను పలు విమానయాన సంస్థలు ఉద్దేశపూర్వకంగా సడలించుకోవడానికి ప్రయత్నిస్తున్నాయనే వాదన ఈ సమస్యను మరింత క్లిష్టతరం చేస్తుంది.