కుక్క కోసం ఇంట్లోకి దూరిన చిరుత.. తర్వాత ఏమైందంటే..? (వీడియో)

దిశ, డైనమిక్ బ్యూరో: తమిళనాడులోని నీలగిరి జిల్లా మసినగుడి సమీపంలోని మోయార్ గ్రామంలో ఓ చిరుత స్థానికులను తీవ్ర భయాందోళనలకు గురిచేసింది. బుధవారం రాత్రి ఓ కుక్కను వేటాడుతూ జనావాసాల్లోకి వచ్చిన చిరుత.. నేరుగా ఓ ఇంట్లోకి దూరింది. సమయస్ఫూర్తితో వ్యవహరించిన ఇంటి యజమాని దానిని ఇంట్లో పెట్టి తాళం వేయడంతో పెను ప్రమాదం తప్పింది.

అసలేం జరిగిందంటే..?

సెల్వప్ప కాలనీకి చెందిన ఎన్. శివకుమార్ ఇంటి పరిసరాల్లో బుధవారం రాత్రి 9:15 గంటల సమయంలో ఓ కుక్కను చిరుత వెంటాడింది. ప్రాణభయంతో ఆ కుక్క ఇంట్లోకి పరుగులు తీయగా, దాని వెంటే చిరుత కూడా ఇంట్లోకి దూరింది. కుక్క అరుపులు విని అప్రమత్తమైన యజమాని శివకుమార్.. చాకచక్యంగా మరో ద్వారం గుండా బయటకు వచ్చి ప్రధాన తలుపుకు బయటి నుంచి తాళం వేశాడు. లోపల బందీ అయిన చిరుత భీకరంగా గర్జిస్తూ కిటికీల వైపు దూసుకొస్తూ బీభత్సం సృష్టించింది. ఆశ్చర్యకరంగా.. చిరుతతో పాటే లోపల చిక్కుకున్న కుక్కకు ఎలాంటి హాని జరగలేదు.

రంగంలోకి అటవీశాఖ..

స్థానికుల సమాచారంతో ముదుమలై టైగర్ రిజర్వ్ (MTR) అటవీశాఖ అధికారులు ఘటనా స్థలానికి చేరుకున్నారు. రెస్క్యూ ఆపరేషన్‌కు ఆటంకం కలగకుండా, రాత్రి 11 గంటలకల్లా స్థానికులందరినీ ఇళ్లలోకి పంపించేశారు. ఇంటి ద్వారం వద్ద ఆటోమేటిక్ బోనును ఏర్పాటు చేసి తలుపులు తెరవగానే.. లోపల ఆందోళనగా ఉన్న చిరుత నేరుగా వచ్చి బోనులో చిక్కుకుంది. దాదాపు ఐదు గంటల ఉత్కంఠ తర్వాత గురువారం వేకువజామున 2:30 గంటలకు ఈ రెస్క్యూ ఆపరేషన్ విజయవంతంగా ముగిసింది. గదిలో చిక్కుకోవడం వల్ల కలిగిన ఒత్తిడి మినహా.. బంధించిన చిరుతకు ఎలాంటి గాయాలు కాలేదని అటవీశాఖ రేంజ్ ఆఫీసర్ వి.రాజన్ తెలిపారు. అనంతరం ఆ చిరుతను సురక్షితంగా సిగూర్ రిజర్వ్ ఫారెస్ట్ ఏరియాలో వదిలిపెట్టారు.