కాలేజీలోని స్టూడెంట్ యూనియన్ గదిలో నోట్ల కట్టల కలకలం.. చెదలు పట్టిన రూ.కోటి కరెన్సీ స్వాధీనం!

దిశ, డైనమిక్ బ్యూరో: పశ్చిమ బెంగాల్ రాజధాని కోల్‌కతాలోని సురేంద్రనాథ్ కాలేజీలో భారీగా నగదు లభ్యం కావడం స్థానికంగా తీవ్ర కలకలం రేపింది. వర్షాకాలం ముంచుకొస్తున్న నేపథ్యంలో మున్సిపల్ అధికారుల సూచనల మేరకు కాలేజీ క్యాంపస్‌లో చేపట్టిన ప్రత్యేక శుభ్రతా కార్యక్రమంలో ఈ విషయం వెలుగుచూసింది. క్యాంపస్‌లోని స్టూడెంట్ యూనియన్ గదిని శుభ్రం చేస్తుండగా, అక్కడ ఉన్న ఒక అల్మారాలో రెండు పాత సూట్‌కేసులు కనిపించాయి. కాలేజీ అధికారుల సమక్షంలో వాటిని తెరవగా, లోపల ఉన్న దృశ్యం చూసి అందరూ షాక్‌కు గురయ్యారు. ఆ సూట్‌కేసుల్లో వంద, ఐదు వందల రూపాయల నోట్ల కట్టలు ఉన్నాయి. అయితే, అవన్నీ పూర్తిగా చెదలు పట్టి, బాగా పాడైపోయిన స్థితిలో దర్శనమిచ్చాయి. ప్రాథమిక అంచనాల ప్రకారం ఈ నగదు విలువ రూ.1 కోటికి పైనే ఉంటుందని తెలుస్తోంది.

రంగంలోకి పోలీసులు..

సమాచారం అందుకున్న ముచిపార పోలీస్ స్టేషన్ సిబ్బంది వెంటనే కాలేజీకి చేరుకుని ఆ సూట్‌కేసులతో పాటు అక్కడ లభించిన కొన్ని పత్రాలను స్వాధీనం చేసుకున్నారు.ఈ నోట్ల కట్టలు ఎంత కాలంగా అక్కడ ఉన్నాయి? ఆ గదిని ఎవరెవరు ఉపయోగించారు? అనే కోణంలో పోలీసులు దర్యాప్తు చేస్తున్నారు. నగదుకు సంబంధించిన ఖచ్చితమైన విలువను లెక్కించేందుకు ఇన్వెంటరీని సిద్ధం చేస్తున్నారు. ముందు జాగ్రత్తగా పక్కనే ఉన్న మరో యూనియన్ గదిని కూడా తెరిచి, అందులోని లాకర్లను తనిఖీ చేస్తున్నారు.

రాజకీయ రంగు పులుముకున్న వివాదం

ఈ ఘటన బెంగాల్‌లో తీవ్ర రాజకీయ దుమారానికి దారితీసింది. ఎన్నికల్లో ఓటర్లకు పంచడానికి అధికార తృణమూల్ కాంగ్రెస్ (TMC) నేతలు ఈ డబ్బును ఇక్కడ దాచారని భారతీయ జనతా పార్టీ (BJP) తీవ్ర ఆరోపణలు చేస్తోంది. ‘ఒక కాలేజీ యూనియన్ గదిలో ఇంత భారీ మొత్తంలో నగదు దాచిపెడితే ఎవరికీ తెలియకుండా ఎలా ఉంటుంది? దీని వెనుక టీఎంసీ విద్యార్థి విభాగం నేతల హస్తం ఉంది’ అని బీజేపీ ఎమ్మెల్యే సజల్ ఘోష్ ఆరోపించారు. దీనిపై సమగ్ర విచారణ జరిపి దోషులను కఠినంగా శిక్షించాలని ఆయన డిమాండ్ చేశారు. ప్రస్తుతం ఈ ఘటనపై కాలేజీ యాజమాన్యం అధికారికంగా ఎలాంటి ప్రకటన చేయనప్పటికీ, పోలీసులు మాత్రం అన్ని కోణాల్లోనూ దర్యాప్తును ముమ్మరం చేశారు.