గిన్నిస్ వరల్డ్ రికార్డ్స్ ఐకాన్గా 194 ఏళ్ల తాబేలు ‘జోనాథన్’
భూమిపై జీవించి ఉన్న అత్యంత వృద్ధ జీవిగా పేరొందిన ‘జోనాథన్’ అనే తాబేలుకు అరుదైన గౌరవం దక్కింది.
దిశ, డైనమిక్ బ్యూరో: భూమిపై జీవించి ఉన్న అత్యంత వృద్ధ జీవిగా పేరొందిన (Jonathan) ‘జోనాథన్’ అనే తాబేలుకు అరుదైన గౌరవం దక్కింది. గిన్నిస్ వరల్డ్ రికార్డ్స్ (GWR) దీనిని అధికారికంగా తన ‘ఐకాన్ 2026’ జాబితాలో చేర్చింది. ప్రస్తుతం 194 వ ఏట అడుగుపెట్టిన ఈ తాబేలు, ప్రపంచంలోనే అత్యంత పురాతన భూచర జీవిగా (Terrestrial animal) తన రికార్డును మరింత సుస్థిరం చేసుకుంది.
చారిత్రక ఘట్టాలకు సజీవ సాక్ష్యం
ఈ సెషెల్స్ జెయింట్ జాతి తాబేలు సుమారు 1832లో జన్మించినట్లు అంచనా వేస్తున్నారు. సాధారణంగా ఈ జాతి తాబేళ్లు 150 ఏళ్లు మాత్రమే జీవిస్తాయి. కానీ జోనాథన్ ఆ పరిమితిని దాటి శతాబ్దాలుగా జీవిస్తోందని శాస్త్రవేత్తలు చెబుతున్నారు. టెలిఫోన్ ఆవిష్కరణ, బ్రిటన్ రాణి విక్టోరియా పాలన, ఈఫిల్ టవర్ నిర్మాణం, ఇంటర్నెట్ యుగం వంటి ప్రపంచాన్ని మార్చిన ఎన్నో చారిత్రక ఘట్టాలకు ఈ తాబేలు సజీవ సాక్ష్యంగా నిలిచింది.
శాస్త్రవేత్తల్లో పెరుగుతున్న ఆసక్తి
ప్రస్తుతం దక్షిణ అట్లాంటిక్ మహాసముద్రంలోని ‘సెయింట్ హెలెనా’ దీవిలో నివసిస్తున్న జోనాథన్ శతాబ్దాల ఆయుష్షు శాస్త్రవేత్తలను సైతం ఆశ్చర్యపరుస్తోంది. దాదాపు రెండు శతాబ్దాలుగా ఇది ఎలా ఆరోగ్యంగా జీవించగలుగుతుందో తెలుసుకునేందుకు పరిశోధకులు దీని డీఎన్ఏ (DNA), కణాల నిర్మాణాన్ని అధ్యయనం చేస్తున్నారు. మానవుల వృద్ధాప్యం, జీవన కాలంపై జరిపే పరిశోధనలకు దీని జీవశాస్త్రం ఎంతో కీలక సమాచారాన్ని అందిస్తుందని భావిస్తున్నారు. ప్రస్తుతం ఈ రికార్డుల రారాజు సెయింట్ హెలెనా దీవిలో ప్రశాంతంగా గడ్డి మేస్తూ, ఎండను ఆస్వాదిస్తూ రోజువారీ జీవితాన్ని గడుపుతోంది.
