రికార్డుల వేటలో త్రిప్తి.. తొలి ఇండియన్ నటిగా అరుదైన గౌరవం

దిశ, సినిమా: బాలీవుడ్ యంగ్ బ్యూటీ త్రిప్తి డిమ్రి ఇప్పుడు కేవలం ఇండియాలోనే కాదు, ప్రపంచవ్యాప్తంగా వార్తల్లో నిలుస్తోంది. ‘యానిమల్’ సినిమాతో ఓవర్ నైట్ స్టార్‌గా మారిపోయిన ఈ భామ, ప్రస్తుతం వరుస విజయాలతో దూసుకుపోతోంది. తాజాగా ఈ ముద్దుగుమ్మ ఒక అరుదైన అంతర్జాతీయ గౌరవాన్ని దక్కించుకుని సంచలన రికార్డు సృష్టించింది. ప్రపంచ ప్రసిద్ధ ఫ్యాషన్ బ్రాండ్ ‘విక్టోరియా సీక్రెట్’ గురించి ప్రత్యేకంగా చెప్పక్కర్లేదు. దశాబ్దాలుగా కేవలం విదేశీ మోడల్స్, హాలీవుడ్ స్టార్స్‌ను మాత్రమే తమ బ్రాండ్ అంబాసిడర్లుగా ఎంచుకునే ఈ సంస్థ, ఇప్పుడు తొలిసారిగా ఒక భారతీయ నటిని తమ అంబాసిడర్‌గా ఎంచుకుంది. ఆ అదృష్టం త్రిప్తి డిమ్రికి దక్కింది. ఫ్యాషన్ ప్రపంచంలోనే ఇది ఒక కీలక మలుపుగా భావిస్తున్నారు. ఇంటర్నేషనల్ లెవల్‌లో మన దేశానికి దక్కిన గొప్ప గౌరవంగా నెటిజన్లు భావిస్తున్నారు.

సినిమాల విషయానికొస్తే, త్రిప్తి క్రేజ్ మామూలుగా లేదు. సందీప్ రెడ్డి వంగా దర్శకత్వంలో ప్రభాస్ హీరోగా రాబోతున్న ‘స్పిరిట్’ చిత్రంలో త్రిప్తి హీరోయిన్‌గా ఎంపికైంది. నిజానికి ఈ పాత్ర కోసం మొదట దీపికా పదుకొణె పేరు వినిపించినప్పటికీ, చివరికి ఆ లక్కీ ఛాన్స్ త్రిప్తినే వరించడం విశేషం. సందీప్ రెడ్డి వంగా సినిమాల్లో హీరోయిన్ల పాత్రలు ఎంత పవర్‌ఫుల్‌గా ఉంటాయో మనకు తెలిసిందే, ఇప్పుడు ప్రభాస్ సరసన త్రిప్తిని చూడటానికి ఫ్యాన్స్ ఎంతో ఆత్రుతగా ఎదురుచూస్తున్నారు. గ్లోబల్ స్థాయిలో బ్రాండ్ అంబాసిడర్‌గా రికార్డు సృష్టించడమే కాకుండా, టాలీవుడ్‌లో ప్రభాస్ వంటి పాన్ ఇండియా స్టార్ సరసన అవకాశం దక్కించుకోవడంతో సోషల్ మీడియాలో త్రిప్తి పేరు మారుమోగిపోతోంది. బాలీవుడ్ నుంచి గ్లోబల్ స్థాయికి ఎదిగిన ఈ ‘నేషనల్ క్రష్’ రాబోయే రోజుల్లో మరిన్ని వండర్స్ క్రియేట్ చేయడం ఖాయం అని నెటిజన్లు చర్చించుకుంటున్నారు.