వివాదాస్పదంగా మారిన ‘టాక్సిక్’ బోల్డ్ టీజర్.. గీతూ మోహన్‌దాస్ షాకింగ్ రియాక్షన్‌ (పోస్ట్)

దిశ, సినిమా: కేజీఎఫ్, కేజీఎఫ్-2 వంటి బ్లాక్‌బస్టర్ చిత్రాలతో పాన్ ఇండియా స్థాయిలో స్టార్‌డమ్ అందుకున్నాడు రాకింగ్ స్టార్ యశ్ (Yash). ఆయన తదుపరి ప్రాజెక్ట్ ‘టాక్సిక్’(Toxic)పై భారీ అంచనాలు నెలకొన్నాయి. గీతూ మోహన్ దాస్ దర్శకత్వంలో తెరకెక్కుతున్న ఈ భారీ ప్రాజెక్ట్‌తో యశ్ మరోసారి ప్రేక్షకులను షాక్ ఇవ్వడానికి సిద్ధమవుతున్నాడు. కెవిఎన్ ప్రొడక్షన్స్ బ్యానర్‌పై రూపొందుతున్న ఈ సినిమా మొదటి నుంచి హాట్ టాపిక్‌గా మారింది. ఈ చిత్రంలో ఏకంగా ఐదుగురు హీరోయిన్లు కీలక పాత్రల్లో కనిపించడం విశేషం. నదియా పాత్రలో కియారా అద్వానీ(Kiara Advani), ఎలిజిబెత్‌గా హుమా ఖురేషీ, రెబెకాగా తారా సుతారియా, మెలిసాగా రుక్మిణి వసంత్(Rukmini Vasanth), గంగ అనే పవర్‌ఫుల్ క్యారెక్టర్‌లో నయనతార నటిస్తోంది. ఇప్పటికే విడుదలైన హీరోయిన్ల క్యారెక్టర్ పోస్టర్లు సినిమాపై అంచనాలను మరింత పెంచేశాయి. ఇటీవల మేకర్స్ విడుదల చేసిన టీజర్‌లో యశ్‌ను రాయ అనే శక్తివంతమైన పాత్రలో పరిచయం చేశారు. యాక్షన్, గ్యాంగ్‌స్టర్ షేడ్స్‌తో కూడిన ఈ లుక్ అభిమానులను ఆకట్టుకున్నప్పటికీ, టీజర్‌లో చూపించిన కొన్ని ఇంటిమేట్ సన్నివేశాలు మాత్రం వివాదానికి దారితీశాయి.

ముఖ్యంగా కారులో యశ్ పాత్ర ఒక యువతితో రొమాన్స్ చేస్తున్న సీన్‌పై కొందరు నెటిజన్లు అభ్యంతరం వ్యక్తం చేస్తూ.. ఇలాంటి సన్నివేశాల ద్వారా సమాజానికి ఎలాంటి సందేశం ఇవ్వాలనుకుంటున్నారని దర్శకురాలిపై విమర్శలు గుప్పించారు. ఈ ట్రోలింగ్‌పై.. తాజాగా దర్శకురాలు గీతూ మోహన్ దాస్ ఇన్‌స్టాగ్రామ్ వేదికగా స్పందించింది. ‘‘మహిళల ఆనందం, వారి సమ్మతి, స్వేచ్ఛ వంటి అంశాలపై సమాజం ఇప్పటికీ చర్చల దశలోనే ఉంది. ఈ చర్చల మధ్య నేను మాత్రం చిల్ అవుతున్నాను’’ అంటూ ఓ కోట్‌ను షేర్ చేసింది. దీంతో ఈ పోస్ట్ ట్రోలర్స్‌ను ఉద్దేశించి చేసిందని నెటిజన్లు భావిస్తున్నారు. ఇక షూటింగ్ శరవేగంగా పూర్తి చేసుకుంటున్న ‘టాక్సిక్’ సినిమా ఉగాది కానుకగా ప్రేక్షకుల ముందుకు రానుంది. మార్చి 19న గ్రాండ్ రిలీజ్‌కు మేకర్స్ ప్లాన్ చేస్తున్నారు. యశ్ ఈసారి ఎలాంటి సంచలనాన్ని సృష్టిస్తాడో అన్న ఆసక్తి ప్రేక్షకుల్లో రోజురోజుకు పెరుగుతోంది.

Read More..

Toxic : యశ్ డ్యూయల్ రోల్ కన్ఫర్మ్?

View this post on Instagram

A post shared by Rima (@rimakallingal)