‘ధురంధర్-2’ సినిమా ఎప్పటికీ మర్చిపోలేని అనుభూతిని ఇస్తుంది.. యామీ గౌతమ్ రివ్యూతో భారీ హైప్

దిశ, సినిమా: రణ్‌వీర్ సింగ్(Ranveer Singh), ఆదిత్య ధర్ (Aditya Dhar)కాంబినేషన్‌లో రాబోతున్న మోస్ట్ అవైటెడ్ సీక్వెల్ ‘ధురంధర్-2’ (Dhurandhar-2)విడుదలకు ముందే ప్రకంపనలు సృష్టిస్తోంది. ఉగాది కానుకగా మార్చి 19న థియేటర్లలోకి రానున్న ఈ సినిమాను, విడుదల కంటే నెల రోజుల ముందే యామీ గౌతమ్ చూశారు. మూవీ చూసిన తర్వాత ఆమె కలిగిన అనుభూతిని సోషల్ మీడియా వేదికగా పంచుకుంటూ అద్భుతమైన రివ్యూ ఇచ్చారు. సినిమా చూసిన తర్వాత తన స్పందనను తెలుపుతూ.. ‘‘ధురంధర్-2 చూశాను. నా భర్త ఆదిత్య ధర్ అసాధారణమైన చిత్రాలను తీస్తున్నారు. ఈ మూవీ ఆడియన్స్‌కు ఎప్పటికీ మర్చిపోలేని అనుభూతిని ఇస్తుంది. సినిమా చూసి నేను చాలా ఎమోషనల్ అయ్యాను. ఆ ఫీలింగ్ నుంచి బయటకు రావడానికి నాకు చాలా సమయం పట్టింది. ఆదిత్య ఈ మూవీ కోసం తన సర్వస్వాన్ని ధారపోశాడు. ఇది అసాధారణమైనది అనే పదానికి మించిన గొప్ప చిత్రం’’ అని ప్రశంసల జల్లు కురిపించారు.

మొదటి భాగం ‘ధురంధర్’ స్క్రిప్ట్ గురించి కూడా యామీ ఆసక్తికర విషయాలు చెప్పారు. ‘‘నేను ఆర్టికల్ 370 షూటింగ్‌లో ఉన్నప్పుడే ధురంధర్ స్క్రిప్ట్ చదివాను. కేవలం 40 పేజీలు చదివేసరికే నా కళ్లు చెమర్చాయి. అప్పుడే ఊహించాను ఈ సినిమా హిస్టరీ క్రియేట్ చేస్తుందని. ఇప్పుడు ధురంధర్-2 అంతకు మించి ఉండబోతోంది’’ అని ధీమా వ్యక్తం చేశారు. ప్రస్తుతం దీనికి సంబంధించిన వీడియో నెట్టింట వైరల్ అవుతూ.. నెటిజన్లలో భారీ అంచనాలను నెలకొల్పింది. కాగా.. ఆదిత్య ధర్ దర్శకత్వంలో రూపొందుతున్న ఈ సినిమాలో సారా అర్జున్ హీరోయిన్‌గా నటిస్తోంది. మొదటి భాగం భారీ కలెక్షన్లు రాబట్టడంతో, సీక్వెల్‌పై భారీ అంచనాలు నెలకొన్నాయి. యశ్ నటించిన 'టాక్సిక్' సినిమాతో పోటీ పడుతున్న తరుణంలో, యామీ గౌతమ్ ఇచ్చిన ఈ పాజిటివ్ రివ్యూ ధురంధర్ టీమ్‌కు పెద్ద బూస్ట్ అని చెప్పొచ్చు.