నాగచైతన్య రేంజ్ మార్చేసిన ‘వృషకర్మ’.. సుకుమార్ ప్రశంసలతో సినిమాపై పెరిగిన హైప్

దిశ, సినిమా: అక్కినేని నాగచైతన్య(Akkineni Nagachaitanya) తన కెరీర్‌లో అత్యంత ప్రతిష్టాత్మకమైన దశలో ఉన్నారు. ‘తండేల్’ వంటి భారీ చిత్రం తర్వాత ఆయన నటిస్తున్న తాజా చిత్రం ‘వృషకర్మ’(Vrushakarma). ‘కార్తికేయ-2’తో పాన్ ఇండియా స్థాయిలో గుర్తింపు తెచ్చుకున్న దర్శకుడు చందూ మొండేటి(Chandoo Mondeti) ఈ చిత్రానికి దర్శకత్వం వహిస్తుండటంతో, మొదటి నుంచే ఈ ప్రాజెక్ట్‌పై భారీ అంచనాలు నెలకొన్నాయి. ఈ సినిమాలో టాలీవుడ్ లేటెస్ట్ సెన్సేషన్ మీనాక్షి చౌదరి హీరోయిన్‌గా నటిస్తోంది. ప్రస్తుతం శరవేగంగా షూటింగ్ జరుపుకుంటున్న ఈ చిత్రం నుండి మేకర్స్ తాజాగా ఒక చిన్న గ్లింప్స్‌ను విడుదల చేశారు. ఈ అప్‌డేట్ చూసిన టాలీవుడ్ దిగ్గజ దర్శకుడు సుకుమార్, చిత్ర యూనిట్‌పై ప్రశంసల వర్షం కురిపించారు. ముఖ్యంగా ఈ కథలోని వైవిధ్యం తనను ఆశ్చర్యపరిచిందని ఆయన పేర్కొన్నారు. ‘‘కార్తీక్ నాకు ఈ స్టోరీ లైన్ చెప్పినప్పుడే చాలా ఎగ్జైటింగ్ గా అనిపించింది. ఇప్పుడు విజువల్స్ చూస్తుంటే అద్భుతంగా ఉన్నాయి’’ అని సుకుమార్ కొనియాడారు.

నాగచైతన్య ఈ సినిమా కోసం కేవలం నటుడిగానే కాకుండా, ప్రతి విభాగంలోనూ భాగమై ప్రాణం పోస్తున్నారని ఆయన ప్రశంసించడం విశేషం. సుకుమార్ వంటి విజనరీ డైరెక్టర్ నుండి ప్రశంసలు రావడంపై నాగచైతన్య సోషల్ మీడియా వేదికగా స్పందించారు. ‘‘మీలాంటి గొప్ప విజనరీ నుంచి ఇలాంటి మాటలు రావడం నాకు దక్కిన గౌరవంగా భావిస్తున్నాను. మీ ప్రశంసలు నాకు ఎంతో స్ఫూర్తినిచ్చాయి. థాంక్యూ సార్’’ అంటూ తన కృతజ్ఞతలు తెలిపారు. చైతన్య తన కెరీర్‌లో ప్రయోగాత్మక చిత్రాలకు ప్రాధాన్యత ఇస్తున్న సమయంలో, ‘వృషకర్మ’ ఖచ్చితంగా మరో మైలురాయిగా నిలుస్తుందని అక్కినేని అభిమానులు నమ్ముతున్నారు. చందూ మొండేటి విజన్, నాగచైతన్య పెర్ఫార్మెన్స్, విజువల్స్‌తో ‘వృషకర్మ’ బాక్సాఫీస్ వద్ద సరికొత్త రికార్డులు సృష్టించేలా కనిపిస్తోంది. ఇక సుకుమారు కూడా ఇందులో భాగస్వామి కావడంతో ఆయన ఈ అవుట్‌పుట్ పట్ల ఎంతో సంతృప్తి వ్యక్తం చేసినట్లు తెలుస్తోంది. దీంతో ఒక్కసారి ‘వృషకర్మ’పై అంచనాలు రెట్టింపు అయ్యాయి.