ప్లీజ్ ఒక్క చాన్స్ ఇవ్వండి.. బ్రేకప్ తర్వాత సినిమాల్లోకి రీఎంట్రీ ఇవ్వబోతున్న నివేదా!
నివేదా తన గతాన్ని వదిలేసి మళ్లీ కెరీర్ మీద దృష్టి పెట్టిందట. ప్రస్తుతం ఆమె మళ్లీ వెండితెరపై మెరవాలని ఆరాటపడుతోంది.
దిశ, సినిమా: తెలుగులో మెంటల్ మదిలో, చిత్రలహరి వంటి సినిమాలతో తనకంటూ ఒక ప్రత్యేక గుర్తింపు తెచ్చుకున్న నివేదా పేతురాజ్ ఇప్పుడు మళ్లీ వార్తల్లో నిలిచింది. ఒకప్పుడు వరుస అవకాశాలతో బిజీగా ఉన్న ఈ నటి, తన వ్యక్తిగత కారణాల వల్ల సినిమాలకు కాస్త విరామం ఇచ్చింది. అయితే, ఇప్పుడు ఆమె మళ్లీ సెకండ్ ఇన్నింగ్స్ ప్రారంభించేందుకు గట్టిగా ప్రయత్నిస్తున్నట్లు సమాచారం. ప్రస్తుతం ఇందుకు సంబంధించిన పోస్టులు సోషల్ మీడియాలో వైరల్గా మారాయి. నివేదా తన కెరీర్ జోరుగా సాగుతున్న సమయంలోనే బిజినెస్ మెన్ రజిత్ ఇబ్రాన్తో ప్రేమలో పడింది. అతనితో జీవితాన్ని పంచుకోవాలని నిర్ణయించుకున్న ఆమె, 2023లో సినిమాలకు దూరం అయింది. అంతేకాకుండా తన ప్రియుడితో క్లోజ్గా దిగిన ఫొటోలను షేర్ చేస్తూ.. కాబోయే భర్తను పరిచయం చేసి అందరినీ ఆశ్చర్యపరిచింది. ఇక పెళ్లి బంధంతో ఒక్కటికాబోతున్నట్లు కూడా హింట్ ఇచ్చేసింది. దీంతో అంతా పెళ్లి చేసుకుని సెటిల్ అయిపోతుందని భావించారు.
ఈక్రమంలోనే.. విధి వైపరీత్యం వల్ల వీరిద్దరి మధ్య మనస్పర్థలు వచ్చి విడిపోయారు. తన ఇన్స్టాగ్రామ్ ఖాతా నుండి ప్రియుడితో ఉన్న ఫోటోలన్నీ తొలగించి బ్రేకప్పై అందరికీ హింట్ ఇచ్చేసింది. తాజాగా రజిత్ మరో అమ్మాయితో నిశ్చితార్థం చేసుకోవడంతో, నివేదా తన గతాన్ని వదిలేసి మళ్లీ కెరీర్ మీద దృష్టి పెట్టిందట. ప్రస్తుతం నివేదా మళ్లీ వెండితెరపై మెరవాలని ఆరాటపడుతోంది. ఇందులో భాగంగా ఆమె టాలీవుడ్లోని పాత మేకర్స్ను, దర్శకులను సంప్రదిస్తున్నట్లు తెలుస్తోంది. గతంలో స్టార్ హీరోల సినిమాల్లో నటించినప్పటికీ, ఇప్పుడు కేవలం హీరోయిన్ పాత్రలే కాకుండా కథలో ప్రాధాన్యత ఉన్న ఎలాంటి పాత్రనైనా ..క్యారెక్టర్ రోల్స్ లేదా సెకండ్ హీరోయిన్గా చేయడానికి తాను సిద్ధమేనని తెలుపుతోందని తెలుస్తోంది. ప్లీజ్ నాకు ఒక్క చాన్స్ ఇవ్వండి అంటూ దర్శకనిర్మాతలను రిక్వెస్ట్ చేస్తోందట. ప్రేమ కోసం ఎదుగుతున్న కెరీర్ను పక్కన పెట్టి, ఇప్పుడు మళ్లీ కష్టాల్లో ఉన్న నివేదాను చూసి నెటిజన్లు సానుభూతి వ్యక్తం చేస్తున్నారు. "ఆమె గొప్ప నటి.. ఖచ్చితంగా మంచి కమ్బ్యాక్ ఇస్తుంది" అని సోషల్ మీడియాలో కామెంట్స్ చేస్తున్నారు.
