ఎన్టీఆర్, బాలయ్య నాకు వార్నింగ్ ఇచ్చారు.. విశ్వక్ సేన్ సంచలన వ్యాఖ్యలు

దిశ, సినిమా: టాలీవుడ్ 'మాస్ కా దాస్' విశ్వక్ సేన్(Vishwak Sen) వైవిధ్యమైన కథలను ఎంచుకోవడంలో ఎప్పుడూ ముందుంటాడు. ప్రయోగాలు చేయడానికి ఏమాత్రం వెనుకాడని ఈ యంగ్ హీరో, గత ఏడాది ‘లైలా’ చిత్రంతో ప్రేక్షకులను ఆశ్చర్యపరిచాడు. ఈ సినిమాలో విశ్వక్ సేన్ అమ్మాయి పాత్రలో నటించి మెప్పించాడు. అయితే, రామ్ నారాయణ్ దర్శకత్వంలో వచ్చిన ఈ యాక్షన్ కామెడీ చిత్రం బాక్సాఫీస్ వద్ద ఆశించిన ఫలితాన్ని అందుకోలేకపోయింది. గతేడాది వాలెంటైన్స్ డే కానుకగా విడుదలైన ఈ మూవీ డిజాస్టర్‌గా మిగిలిపోయింది. తాజాగా తన కొత్త సినిమా 'ఫంకీ' ప్రమోషన్స్‌లో భాగంగా విశ్వక్ సేన్ ఒక షాకింగ్ విషయాన్ని వెల్లడించాడు.

‘లైలా’ సినిమా చూసిన తర్వాత టాలీవుడ్ అగ్ర హీరోలు ఎన్టీఆర్(NTR), బాలకృష్ణ (Balakrishna)గారు తనకు ఫోన్ చేసి గట్టిగా వార్నింగ్ ఇచ్చారని విశ్వక్ తెలిపాడు. ‘‘లైలా మూవీ చూశాక ఇద్దరూ నన్ను పిలిచారు. ఎప్పటికీ మళ్ళీ అలాంటి ప్రయోగాలు, అలాంటి చిత్రాలు చేయకు అని గట్టిగా చెప్పారు. ఒక రకంగా అది నాకు హెచ్చరిక లాంటిదే’’ అని విశ్వక్ చెప్పుకొచ్చాడు. మాస్ ఇమేజ్ ఉన్న హీరో ఇలాంటి పాత్రలు చేయడం వల్ల కెరీర్‌పై ప్రభావం పడుతుందన్న ఉద్దేశంతోనే వారు అలా చెప్పి ఉంటారని ఇండస్ట్రీలో చర్చ నడుస్తోంది. ప్రస్తుతం ఈ కామెంట్స్ సోషల్ మీడియాలో తెగ వైరల్ అవుతున్నాయి.

ఇక వరుస ఫ్లాపులతో ఉన్న విశ్వక్ సేన్, ఈసారి ఎలాగైనా హిట్ కొట్టాలనే పట్టుదలతో ఉన్నాడు. ‘జాతి రత్నాలు’ ఫేమ్ అనుదీప్ కేవి దర్శకత్వంలో ‘ఫంకీ’ అనే అవుట్ అండ్ అవుట్ ఎంటర్‌టైనర్‌తో రాబోతున్నాడు. కయాదు లోహర్ హీరోయిన్‌గా నటిస్తున్న ఈ చిత్రాన్ని సితార ఎంటర్‌టైన్‌మెంట్స్, ఫార్చ్యూన్ ఫోర్ సినిమాస్ సంస్థలు సంయుక్తంగా నిర్మిస్తున్నాయి. భీమ్స్ సిసిరోలియో సంగీతం అందిస్తున్న ఈ చిత్రం ఫిబ్రవరి 13న విడుదల కానుంది. ప్రయోగాలు పక్కన పెట్టి, తన మార్క్ కామెడీ, మాస్‌తో విశ్వక్ ఈసారి బాక్సాఫీస్ వద్ద మళ్ళీ పుంజుకుంటాడని అభిమానులు ఆశిస్తున్నారు. ఈ సారి ఎలాగైనా హిట్ అందుకుంటాడని అభిప్రాయపడుతున్నారు.

రేపే ‘ఫంకీ’ నవ్వుల విందు.. కయాదు లోహర్ క్రేజీ పోస్ట్‌తో భారీ హైప్