చెత్త కథను ఏ స్టార్ కూడా మోసుకెళ్లలేడు.. ఇండస్ట్రీలో మార్పు రావాలంటూ హీరోయిన్ షాకింగ్ స్టేట్‌మెంట్

దిశ, సినిమా: బాలీవుడ్ స్టార్ హీరో రణ్‌వీర్ సింగ్ (Ranveer Singh)నటించిన ‘ధురంధర్’ (Dhurandhar)బాక్సాఫీస్ వద్ద సంచలనం సృష్టించిన విషయం తెలిసిందే. తొలి షో నుంచే పాజిటివ్ టాక్‌తో దూసుకెళ్లిన ఈ సినిమా భారీ కలెక్షన్లతో రికార్డులు బద్దలు కొడుతోంది. విమర్శకుల ప్రశంసలు అందుకుంటూ, విడుదలై చాలా రోజులు గడిచినా ఇప్పటికీ హిట్ టాక్ కొనసాగిస్తూ ప్రేక్షకులను థియేటర్లకు ఆకర్షిస్తోంది. ఇదిలా ఉండగా, తాజాగా ఈ చిత్రంపై హీరోయిన్ చిత్రాంగదా సింగ్(Chitrangada Singh) ప్రశంసల వర్షం కురిపించారు. ప్రస్తుత సినిమా ఇండస్ట్రీలో కేవలం స్టార్ పవర్ ఉంటే సరిపోదని, బలమైన కథ ఉంటేనే విజయం సాధ్యమని నటి చిత్రాంగదా సింగ్ స్పష్టం చేశారు. ‘ధురంధర్’ సాధించిన ఘన విజయం చిత్ర పరిశ్రమకు ఒక పెద్ద ‘వేక్-అప్ కాల్’ వంటిదని ఆమె అభిప్రాయపడ్డారు.

మంచి కథ, పటిష్టమైన స్క్రీన్‌ప్లే ఉంటే సినిమా ఎంతటి అద్భుతాలు సృష్టించగలదో ‘ధురంధర్’ నిరూపించిందని, ఇకనైనా మన ఇండస్ట్రీ రచయితలకు, రచనకు ఇచ్చే ప్రాధాన్యతను పెంచాలని ఆమె కోరారు. ముఖ్యంగా సినిమా ఫెయిల్యూర్స్‌కు సంబంధించి చిత్రాంగదా ఒక ఆసక్తికరమైన విషయాన్ని పంచుకున్నారు. కథలో బలం లేనప్పుడు లేదా దర్శకత్వ లోపాలు ఉన్నప్పుడు, ఆ భారాన్ని కేవలం నటీనటుల మీదకు నెట్టేయడం సరైంది కాదని ఆమె అన్నారు. ‘ఒక స్టార్ నటుడు మాత్రమే చెత్త రాతను, సరైన విజన్ లేని దర్శకత్వాన్ని మోయలేడు.. అది ఎవరికీ సాధ్యం కాదు’ అని ఆమె కుండబద్దలు కొట్టినట్లు చెప్పారు. ‘ధురంధర్’ లాంటి సినిమాలు రావడం వల్ల రచయితల శక్తి ఏంటో అందరికీ అర్థమవుతోందని, భవిష్యత్తులో ఇలాంటి గొప్ప రచనలు మరిన్ని రావాలంటే.. ఇండస్ట్రీలో మార్పు రావాలని అన్నారు.