‘స్వయంభు’ ఫస్ట్ సింగిల్ అప్డేట్ ఇచ్చిన నిఖిల్.. పవర్ ఫుల్ పోస్టర్ విడుదల

దిశ, సినిమా: యంగ్ హీరో నిఖిల్ సిద్ధార్థ్ కెరీర్‌లోనే అత్యంత భారీ బడ్జెట్‌తో, పాన్ ఇండియా లెవల్లో తెరకెక్కుతున్న పీరియాడిక్ యాక్షన్ డ్రామా ‘స్వయంభు’. భరత్ కృష్ణమాచారి దర్శకత్వంలో రూపొందుతున్న ఈ చిత్రంపై టాలీవుడ్‌లో భారీ అంచనాలు నెలకొన్నాయి. నిఖిల్ ఈ సినిమా కోసం తన బాడీ లాంగ్వేజ్‌ను పూర్తిగా మార్చుకోవడమే కాకుండా, యుద్ధ విద్యల్లో కూడా ప్రత్యేక శిక్షణ తీసుకున్నారు. ఇందులో నిఖిల్ సరసన నభా నటేష్, సంయుక్త మీనన్ హీరోయిన్లుగా నటిస్తున్నారు. పిక్సెల్ స్టూడియోస్, ఠాకూర్ మధు ప్రజెంట్స్ బ్యానర్లపై ఈ సినిమా నిర్మాణం జరుపుకుంటోంది. నిజానికి ఈ సినిమాను ఏప్రిల్ 30న గ్రాండ్‌గా విడుదల చేయాలని చిత్రబృందం ప్లాన్ చేసింది. అయితే, అదే రోజున మరో క్రేజీ ప్రాజెక్ట్ ‘పెద్ది’ విడుదలవుతుండటంతో, బాక్సాఫీస్ వద్ద అనవసరమైన క్లాష్ వద్దు అని నిఖిల్ భావిస్తున్నారట. సోలో రిలీజ్ ఉంటేనే వసూళ్లు బాగుంటాయని భావించి, ‘స్వయంభు’ను మే నెల చివరి వారానికి వాయిదా వేసినట్లు సమాచారం.

ఈ విషయాన్ని తెలుపుతూ, నిఖిల్ తన సోషల్ మీడియా పోస్ట్‌లో సినిమా ‘సమ్మర్ స్పెషల్’గా రాబోతుందని క్లారిటీ ఇచ్చారు. ప్రమోషన్స్‌లో భాగంగా చిత్రబృందం మ్యూజికల్ జర్నీని ప్రారంభించింది. ఈ సినిమాలోని మొదటి పాట ‘రారా ధీవర’ను ఏప్రిల్ 16న విడుదల చేయబోతున్నట్లు అధికారికంగా ప్రకటించారు. ‘కె.జి.ఎఫ్’ వంటి చిత్రాలకు అదిరిపోయే మ్యూజిక్ ఇచ్చిన రవి బస్రూర్ సంగీతం అందిస్తున్నారు. ఈ సాంగ్ అప్‌డేట్ ఇస్తూ నిఖిల్ షేర్ చేసిన పోస్టర్ ఇప్పుడు నెట్టింట వైరల్ అవుతోంది. అందులో నిఖిల్ చేతిలో బల్లెం పట్టుకుని, అడవిలో ఒక యోధుడిలా కనిపిస్తున్న లుక్ సినిమాలోని ఇంటెన్సిటీని పెంచేసింది. ట్విట్టర్ వేదికగా నిఖిల్ స్పందిస్తూ.. "స్వయంభు ఫస్ట్ సాంగ్ వీడియోతో వస్తున్నాం. మీ అందరికీ నచ్చుతుందని ఆశిస్తున్నాను. ఈ ఏప్రిల్ 16న కుమ్మేద్దాం.. రవి బస్రూర్ భయ్యా" అంటూ క్యాప్షన్ ఇచ్చారు. నిఖిల్ కెరీర్‌లోనే ఇది బిగ్గెస్ట్ హిట్ అవుతుందని ఫ్యాన్స్ ధీమా వ్యక్తం చేస్తున్నారు.