చివరి నిమిషంలో ‘హే భగవాన్’ టైటిల్ విషయంలో మూవీ మేకర్స్ కీలక నిర్ణయం..

దిశ, సినిమా: టాలీవుడ్‌లో వరుస విజయాలతో దూసుకుపోతున్న హీరో సుహాస్(Suhas), శివాని నాగరం (Shivani Nagaram)జంటగా నటించిన లేటెస్ట్ మూవీ ‘హే భగవాన్’ (Hey Bhagavan)విడుదలకు సిద్ధమైంది. 'అంబాజీపేట మ్యారేజ్ బ్యాండ్' తర్వాత వీరిద్దరి కాంబినేషన్‌లో వస్తున్న ఈ చిత్రంపై భారీ అంచనాలు ఉన్నాయి. అయితే, ఈ సినిమాకు సెన్సార్ బోర్డు నుండి ఊహించని షాక్ తగిలింది. మొదట ఈ చిత్రానికి ‘హే భగవాన్!’ అనే టైటిల్‌ను ఖరారు చేసి ప్రమోషన్లు కూడా పూర్తి చేశారు. కానీ, సెన్సార్ బోర్డు ఈ టైటిల్‌పై అభ్యంతరం వ్యక్తం చేయడంతో మేకర్స్ చివరి నిమిషంలో పేరు మార్చక తప్పలేదు. సెన్సార్ బోర్డు నిబంధనల ప్రకారం.. దైవ నామాలను లేదా భక్తికి సంబంధించిన పదాలను వినోదం కోసం వాడటంపై కొన్ని ఆంక్షలు ఉన్నాయి. అందుకే. ‘హే భగవాన్’ అనే పేరు మార్చకపోతే సినిమాకు 'A' సర్టిఫికేట్ ఇస్తామని బోర్డు తేల్చి చెప్పడంతో, చిత్ర యూనిట్ వెనక్కి తగ్గి టైటిల్‌ను ‘హే బలవంత్!’ (Hey Balawanth!) గా మార్చింది. ఈ విషయాన్ని మూవీ టీమ్ అధికారికంగా ప్రకటించింది.

కేవలం నాలుగు రోజుల ముందే ఇలా టైటిల్ మారడం సినిమా ప్రమోషన్లపై కొంత ప్రభావం చూపే అవకాశం ఉన్నప్పటికీ మూవీ మేకర్స్ U/Aసర్టిఫికెట్ కోసం ఈ నిర్ణయం తీసుకున్నట్లు తెలుస్తోంది. ఇక ఈ విషయం తెలుసుకున్న సినీ ప్రియులు షాక్ అవుతున్నారు. కాగా.. గోపి అచ్చర దర్శకత్వంలో తెరకెక్కిన ఈ సినిమాలో వీకే నరేష్, యాంకర్ స్రవంతి, అన్నపూర్ణమ్మ కీలక పాత్రల్లో నటించారు. తండ్రీకొడుకుల మధ్య సాగే ఒక విభిన్నమైన కామెడీ ఎంటర్‌టైనర్‌గా రూపొందిన ఈ చిత్రం ఫిబ్రవరి 20న గ్రాండ్‌గా విడుదల కాబోతోంది. అయితే ఇలా జరగడం ఇదే మొదటిసారి కాదు. ఇటీవల ఇలాంటి సమస్యలు టాలీవుడ్‌లో ఎక్కువయ్యాయి. సంతోష్ శోభన్ నటించిన ‘కపుల్ ఫ్రెండ్లీ’ టైటిల్ మార్చకపోవడం వల్ల ఆ సినిమాకు 'A' సర్టిఫికేట్ ఇచ్చారు. గత నెలలో ‘వానర’ అనే సినిమా పేరును కూడా ‘వనవీర’గా మార్చాల్సి వచ్చింది.