సమ్మర్ బరిలో ‘కారా’.. విడుదల తేదీ ప్రకటించిన మూవీ మేకర్స్

దిశ, సినిమా: బాక్సాఫీస్ వద్ద తనదైన ముద్ర వేసే కోలీవుడ్ స్టార్ హీరో ధనుష్(Dhanush), ఈ సమ్మర్ బరిలోకి దిగేందుకు సిద్ధమయ్యారు. ఆయన నటిస్తున్న లేటెస్ట్ యాక్షన్ ఎంటర్‌టైనర్ ‘కారా’(kaara)విడుదల తేదీని చిత్ర యూనిట్ అధికారికంగా ప్రకటించింది. విఘ్నేష్ రాజా దర్శకత్వంలో రూపుదిద్దుకుంటున్న ఈ చిత్రం, వేసవి కానుకగా ఏప్రిల్ 30న ప్రపంచవ్యాప్తంగా విడుదల కానుంది. ఈ సినిమాలో ధనుష్ ‘కరసామి’ అనే పత్తి రైతు పాత్రలో కనిపించబోతున్నారు. ఇప్పటివరకు ఎన్నో వైవిధ్యమైన పాత్రలు చేసిన ధనుష్.. ఇందులో పక్కా గ్రామీణ నేపథ్యంలో సాగే ఎమోషనల్ సస్పెన్స్ థ్రిల్లర్‌తో ప్రేక్షకులను అలరించనున్నారు. ఈ మధ్య కాలంలో ధనుష్ ఎంచుకుంటున్న కథలు సహజత్వానికి దగ్గరగా ఉంటుండటంతో, ‘కారా’పై ప్రేక్షకుల్లో భారీ అంచనాలు నెలకొన్నాయి. ఈ చిత్రంలో ధనుష్ సరసన ‘ప్రేమలు’ బ్యూటీ మమిత బైజు హీరోయిన్‌గా నటిస్తోంది.

వీరిద్దరి కాంబినేషన్ చూడటానికి అభిమానులు ఎంతో ఆసక్తిగా ఎదురుచూస్తున్నారు. వీరితో పాటు జయరామ్, రవికుమార్, సూరజ్ వెంజాకమూడు, కరుణాస్ వంటి ప్రముఖ నటులు కీలక పాత్రల్లో కనిపిస్తారు. జీవీ ప్రకాష్ కుమార్ ఈ సినిమాకు సంగీతం అందిస్తుండటం విశేషం. ధనుష్-జీవీ ప్రకాష్ కాంబినేషన్‌లో వచ్చే పాటలు ఎప్పుడూ సూపర్ హిట్ అవుతాయి కాబట్టి, ఈ సినిమా ఆడియోపై కూడా మంచి హైప్ ఉంది. నిర్మాత ఐషారి గణేష్ ఈ చిత్రాన్ని అత్యంత ప్రతిష్టాత్మకంగా నిర్మించారు. ఏప్రిల్ 30న సినిమా విడుదల కాబోతుండటంతో, సమ్మర్ సెలవులను ఈ చిత్రం బాగా క్యాష్ చేసుకునే అవకాశం ఉంది. సమ్మర్ బరిలో ఇప్పటికే పలువురు స్టార్ హీరోల సినిమాలు ఉండగా, ధనుష్ ‘కారా’ వాటికి గట్టి పోటీ ఇవ్వడం ఖాయంగా కనిపిస్తోంది.