స్టార్ హీరో తనయుడితో కళ్యాణి ప్రియదర్శన్ పెళ్లి.. పోస్ట్‌తో క్లారిటీ ఇచ్చేసిన హీరోయిన్ తల్లి!

దిశ, సినిమా: మలయాళ చిత్రపరిశ్రమలో తనకంటూ ఒక ప్రత్యేక గుర్తింపు తెచ్చుకున్న కళ్యాణి ప్రియదర్శన్, ప్రస్తుతం సౌత్ ఇండియాలోనే మోస్ట్ వాంటెడ్ హీరోయిన్లలో ఒకరిగా దూసుకుపోతున్నారు. దిగ్గజ దర్శకుడు ప్రియదర్శన్, సీనియర్ నటి లిజిల గారాల పట్టిగా వెండితెరకు పరిచయమైన ఈ భామ, అనతి కాలంలోనే తన సొంత ప్రతిభతో స్టార్ హోదాను దక్కించుకున్నారు. ముఖ్యంగా ‘హృదయం’ మూవీలో ఈమె పండించిన భావోద్వేగాలు ప్రేక్షకుల మనసు గెలుచుకున్నాయి. కేవలం సినిమాలతోనే కాకుండా, తన వ్యక్తిగత జీవితానికి సంబంధించిన వార్తలతోనూ కళ్యాణి తరచూ సోషల్ మీడియాలో హాట్ టాపిక్‌గా మారుతుంటారు. కళ్యాణి ప్రియదర్శన్, మలయాళ సూపర్ స్టార్ మోహన్ లాల్ తనయుడు ప్రణవ్ మోహన్ లాల్ మధ్య ఏదో నడుస్తోందని, వీరిద్దరూ త్వరలోనే పెళ్లి పీటలు ఎక్కబోతున్నారని గత కొంతకాలంగా మాలీవుడ్‌లో గట్టిగా వినిపిస్తోంది.

వీరిద్దరూ కలిసి నటించిన సినిమాల్లో వారి కెమిస్ట్రీ చూసిన అభిమానులు, ఈ రీల్ లైఫ్ జోడీ రియల్ లైఫ్‌లో కూడా ఒక్కటైతే బాగుంటుందని ఆశపడుతున్నారు. ఈ పెళ్లి పుకార్లకు తాజాగా కళ్యాణి తల్లి, నటి లిజి లక్ష్మి ఒకే ఒక్క కామెంట్‌తో చెక్ పెట్టారు. మలయాళీ పండుగ ‘విషు’ సందర్భంగా లిజి సోషల్ మీడియాలో కొన్ని ఫొటోలను షేర్ చేయగా, ఒక నెటిజన్ "కళ్యాణి - ప్రణవ్ పెళ్లి కోం ఎదురుచూస్తున్నాం" అని నేరుగా ప్రశ్నించాడు. దీనిపై లిజి స్పందిస్తూ.. "అవన్నీ కేవలం అబద్ధపు వార్తలు మాత్రమే, అస్సలు నమ్మకండి" అని తేల్చి చెప్పారు. దీంతో ఈ స్టార్ కిడ్స్ పెళ్లిపై జరుగుతున్న ప్రచారమంతా వట్టిదేనని స్పష్టమైంది. ప్రస్తుతం కళ్యాణి తన కెరీర్‌లోని క్రేజీ ప్రాజెక్టులతో బిజీగా ఉండగా, ప్రణవ్ తన విలక్షణమైన జీవనశైలితో ప్రయాణాలు చేస్తూ బిజీగా ఉన్నారు. వీరిద్దరూ మంచి స్నేహితులు మాత్రమేనని కుటుంబ సభ్యుల మాటలను బట్టి అర్థమవుతోంది.