‘జననాయగన్’ విడుదల కావడం అసాధ్యం అంటూ ప్రకటన విడుదల.. తీవ్ర నిరాశలో విజయ్ అభిమానులు

దిశ, సినిమా: దళపతి విజయ్ (Thalapathi Vijay)తన సినీ కెరీర్‌కు గుడ్ బై చెప్తూ చేస్తున్న చివరి చిత్రం ‘జననాయగన్’ గురించి ఒక చేదు వార్త బయటకు వచ్చింది. ఈ సినిమా ఏప్రిల్ 30 లోపు విడుదలయ్యే అవకాశం లేదని స్పష్టమవుతోంది. హెచ్. వినోద్ దర్శకత్వంలో ఎంతో ప్రతిష్టాత్మకంగా తెరకెక్కుతున్న ఈ సినిమా వాయిదా పడటం అభిమానులను తీవ్ర నిరాశకు గురిచేస్తోంది. ఈ సినిమా యూనిట్ నుండి ఇంకా అధికారిక ప్రకటన రాకపోయినప్పటికీ, కెనడాలోని ప్రముఖ డిస్ట్రిబ్యూటర్ యార్క్ సినిమాస్ (York Cinemas) సోషల్ మీడియా వేదికగా క్లారిటీ ఇచ్చింది. ‘‘జననాయగన్(Jananayagan) ఏప్రిల్ 30 లోపు విడుదల కావడం అసాధ్యం. ఇప్పటికే టికెట్లు బుక్ చేసుకున్న వారు రీఫండ్ కోసం థియేటర్లను సంప్రదించవచ్చు’’ అని వారు పేర్కొన్నారు. దీన్ని బట్టి చూస్తుంటే.. సమ్మర్ కానుకగా రాబోతున్నట్లు తెలుస్తోంది. అయితే తమిళనాడులో ఏప్రిల్‌లో అసెంబ్లీ ఎన్నికలు జరగనున్నాయి. విజయ్ తన సొంత పార్టీ తమిళగ వెట్రి కజగం (TVK) ప్రచారంలో బిజీగా ఉండనున్నారు.

రాజకీయ ప్రాధాన్యత ఉన్న సినిమా కావడంతో ఎన్నికలకు ముందే రిలీజ్ చేయాలని భావించినా, సాంకేతిక, న్యాయపరమైన చిక్కుల వల్ల అది సాధ్యపడటం లేదు. కాగా.. ఈ సినిమా నిజానికి సంక్రాంతికే విడుదల కావాల్సింది. కానీ సినిమాలోని రాజకీయ అంశాల కారణంగా సెన్సార్ బోర్డు (CBFC) సర్టిఫికేట్ ఇవ్వడానికి నిరాకరించింది. ఈ వివాదం మద్రాస్ హైకోర్టు వరకు వెళ్ళింది. ప్రస్తుతం నిర్మాత కెవిఎన్ ప్రొడక్షన్స్ ఈ సమస్యను పరిష్కరించుకోవడానికి రివైజింగ్ కమిటీని ఆశ్రయించింది. సెన్సార్ క్లియరెన్స్ రాకపోవడం వల్లే విడుదల ఆలస్యమవుతోంది. హెచ్. వినోద్ దర్శకత్వంలో తెరకెక్కుతున్న ఈ సినిమాలో పూజా హెగ్డే, బాబీ డియోల్, మమితా బైజు ప్రధాన పాత్రల్లో నటిస్తున్నారు. అనిరుధ్ రవిచందర్ సంగీతం అందించిన ఈ చిత్రం మే లేదా జూన్ నెలలో విడుదలయ్యే అవకాశం ఉంది.