విజయ్-త్రిష పెళ్లిలో డ్యాన్స్ చేస్తా.. రాఖీ సావంత్ షాకింగ్ కామెంట్స్

దిశ, సినిమా: తమిళనాడు రాజకీయాలు ప్రస్తుతం ఒక ఉత్కంఠభరితమైన సినిమాను తలపిస్తున్నాయి. ఇటీవల జరిగిన ఎన్నికల ఫలితాల్లో దళపతి విజయ్ నేతృత్వంలోని టీవీకే (TVK) పార్టీ 107 స్థానాలను కైవసం చేసుకుని అతిపెద్ద పార్టీగా అవతరించింది. అయితే, ప్రభుత్వ ఏర్పాటుకు అవసరమైన మ్యాజిక్ ఫిగర్‌కు మరో 11 సీట్ల దూరం ఉండటంతో గత కొన్ని రోజులుగా సస్పెన్స్ కొనసాగుతోంది. విజయ్ ఇప్పటికే పలుమార్లు గవర్నర్‌ను కలిసినా, ప్రమాణ స్వీకార ముహూర్తంపై స్పష్టత రాలేదు. తాజా సమాచారం ప్రకారం.. అన్ని అడ్డంకులు తొలగి మే 10న మధ్యాహ్నం 3 గంటలకు విజయ్ ముఖ్యమంత్రిగా ప్రమాణ స్వీకారం చేసే అవకాశం ఉందని తెలుస్తోంది. ఒకవైపు రాజకీయాల్లో ఇంతటి హడావుడి జరుగుతుంటే, మరోవైపు విజయ్ వ్యక్తిగత జీవితంపై సోషల్ మీడియాలో రకరకాల పుకార్లు షికార్లు చేస్తున్నాయి. ముఖ్యంగా విజయ్, స్టార్ హీరోయిన్ త్రిష బంధం గురించి, వారిద్దరూ త్వరలోనే వివాహం చేసుకోబోతున్నారంటూ పెద్ద ఎత్తున ప్రచారం సాగుతోంది. ఈ చర్చ ఇలా ఉండగానే, బాలీవుడ్ వివాదాస్పద నటి రాఖీ సావంత్ చేసిన వ్యాఖ్యలు ఇప్పుడు అగ్నికి ఆజ్యం పోసినట్లు అయ్యాయి.

ఎప్పుడూ ఏదో ఒక కామెంట్ చేసి వార్తల్లో నిలిచే రాఖీ సావంత్, విజయ్-త్రిష పెళ్లి అంశంపై నోరు పారేసుకుంది. "త్రిష నాకు ఎప్పటి నుంచో తెలుసు. ఆమె ఎంతో కష్టపడి ఈ స్థాయికి చేరుకుంది. నాకు విజయ్ అంటే చాలా ఇష్టం, ఆయనతో కలిసి నటించాలని, కనీసం ఒక పాటలో అయినా స్టెప్పులు వేయాలని ఎప్పటి నుంచో కలలు కన్నాను. కానీ ఆ అవకాశం రాలేదు. ఇప్పుడు వారికీ పెళ్లి జరిగితే, కనీసం వారి మెహందీ వేడుకలో లేదా పెళ్లిలో అయినా డ్యాన్స్ చేస్తాను. ఆ సమయంలో ఇద్దరితో కలిసి ఫోటో దిగుతాను" అంటూ రాఖీ చెప్పుకొచ్చింది. విజయ్ ఒక రాష్ట్రానికి ముఖ్యమంత్రి అయ్యే బాధ్యతాయుతమైన పనిలో నిమగ్నమై ఉంటే, రాఖీ సావంత్ మాత్రం తన పబ్లిసిటీ కోసం ఇలాంటి చిల్లర వ్యాఖ్యలు చేయడంపై నెటిజన్లు తీవ్రంగా మండిపడుతున్నారు. గతంలో బిగ్ బాస్ షో నుంచి మొదలుకొని, ఇండస్ట్రీలో ఏ చిన్న విషయం జరిగినా దానిపై స్పందిస్తూ ట్రెండ్ అవ్వాలని చూసే రాఖీ తీరును నెటిజన్లు తప్పుపడుతున్నారు. "సమయం సందర్భం లేకుండా మాట్లాడటం నీకు అలవాటే" అంటూ సోషల్ మీడియా వేదికగా ఆమెపై విమర్శల వర్షం కురిపిస్తున్నారు.