హారర్ అంటే నవ్వులాట కాదు. వణికించడానికి వస్తున్న ప్రశాంత్ నీల్ ‘418’

దిశ, సినిమా: మాస్ సినిమాలతో బాక్సాఫీస్‌ను షేక్ చేసే దర్శకుడు ప్రశాంత్ నీల్, ఇప్పుడు రూట్ మార్చి హారర్ ప్రాజెక్టుతో ప్రేక్షకుల ముందుకు రాబోతున్నారు. ఈ సినిమా పేరు ‘418’. హారర్-కామెడీ చిత్రాల హవా నడుస్తున్న ఈ రోజుల్లో, వాటన్నింటికీ భిన్నంగా ప్రేక్షకులను వణికించే ప్యూర్ హారర్ మూవీగా ఇది రూపొందుతోంది. దర్శకుడు కీర్తన్ నాదగౌడ ఈ చిత్రాన్ని తెరకెక్కిస్తున్నారు. "హారర్ సినిమాల్లో నవ్వింది చాలు.. ఇక భయపడాల్సిన సమయం వచ్చింది" అనే ట్యాగ్‌లైన్‌తో ఈ సినిమా పోస్టర్ బయటకు వచ్చింది. అంటే, ఈ సినిమాలో కామెడీకి అస్సలు చోటు ఉండదని, కేవలం భయం, మిస్టరీ మాత్రమే ప్రధానాంశంగా ఉంటాయని చిత్రబృందం స్పష్టం చేస్తోంది. విడుదలైన టైటిల్ పోస్టర్ చూస్తేనే ప్రేక్షకులకు గూస్‌బంప్స్ రావడం ఖాయం. రక్తం మరకలతో ఉన్న ఒక తలుపు, దానిపై ‘418’ అనే నంబర్ ఉంచడం చూస్తుంటే, ఇందులో ఏదో పెద్ద మిస్టరీ ఉందని అర్థమవుతోంది. ఇది కేవలం దెయ్యాల కథా లేక సైకలాజికల్ థ్రిల్లరా అనేది తెలియాలంటే సినిమా రిలీజ్ వరకు ఆగాల్సిందే.

ఈ సినిమాకు ఉన్న అతిపెద్ద ప్లస్ పాయింట్ ప్రశాంత్ నీల్. ఆయన సినిమాల్లో ఉండే డార్క్ థీమ్, ఇంటెన్స్ యాక్షన్, ఈ హారర్ మూవీకి కూడా తోడైతే బ్లాక్ బస్టర్ హిట్ అవడం ఖాయం. మైత్రీ మూవీ మేకర్స్ వంటి పెద్ద నిర్మాణ సంస్థ, ప్రశాంత్ నీల్ లాంటి విజనరీ దర్శకుడు కలిసి ఈ సినిమాను సమర్పిస్తుండటంతో, ఇది పాన్ ఇండియా స్థాయిలో భారీ అంచనాలను క్రియేట్ చేస్తోంది. మాస్ డైరెక్టర్ హారర్ ప్రపంచంలోకి అడుగుపెడుతుండటంతో ఆడియన్స్‌లో ఆసక్తి రెట్టింపు అయ్యింది. ఈ చిత్రంలో సూర్య రాజ్, చరణ్ లక్కరాజు, ప్రీతి పగడల్ ప్రధాన పాత్రల్లో నటిస్తున్నారు. నటుల ఎంపికలో కూడా కొత్తదనం కనిపిస్తోంది. ప్రస్తుతం ఈ సినిమా షూటింగ్ వేగంగా జరుగుతోంది. హారర్ సినిమాలను ఇష్టపడే వారికి ‘418’ ఒక సరికొత్త అనుభవాన్ని ఇస్తుందని చిత్రయూనిట్ నమ్మకంగా ఉంది. ప్రశాంత్ నీల్ సపోర్ట్ ఉంది కాబట్టి, మేకింగ్ పరంగా కూడా సినిమా హాలీవుడ్ స్థాయి క్వాలిటీతో ఉండే అవకాశం ఉంది.