హీరోయిన్ల దుస్తులపై మళ్ళీ చర్చ..శరీరం చూపిస్తానంటే సహించనంటూ ఇంద్రజ సెన్సేషనల్ కామెంట్స్

దిశ, సినిమా: మహిళా నటీమణులు బహిరంగ వేదికలపై పొట్టి దుస్తులు లేదా అసభ్యకరంగా అనిపించే మోడ్రన్ దుస్తులు ధరించడంపై శివాజీ (Shivaji)చేసిన విమర్శలు సోషల్ మీడియాలో రెండు వర్గాలుగా విడిపోయేలా చేశాయి. కొందరు దీన్ని వ్యక్తిగత స్వేచ్ఛ అంటే, మరికొందరు పద్ధతిగా ఉండాలని వాదించారు. ఈ క్రమంలోనే నటి ఇంద్రజ చేసిన వ్యాఖ్యలు ఇప్పుడు ఈ చర్చకు మరింత బలాన్ని చేకూర్చాయి. ఓ ఇంటర్వ్యూలో మాట్లాడుతూ.. బహిరంగ ప్రదేశాల్లో మహిళలు అనుచితమైన మోడ్రన్ దుస్తులు ధరించడాన్ని తాను ఎప్పుడూ వ్యతిరేకిస్తానని స్పష్టం చేశారు. ‘‘మనం సమాజానికి ఏం చూపిస్తున్నాం? ప్రజలు తాము చూసే దాని ఆధారంగానే మనల్ని అంచనా వేస్తారు. నన్ను జడ్జ్ చేయవద్దు.. నా ఇష్టాలను ప్రశ్నించవద్దు అని చెప్పినంత మాత్రాన మనం చేసేదంతా సరైనది అయిపోదు.

ఇంట్లో లేదా సన్నిహితుల మధ్య ఏం ధరిస్తారనేది వ్యక్తిగత ఇష్టం కావచ్చు, కానీ సమాజంలోకి వచ్చినప్పుడు లేదా సోషల్ మీడియాలో పోస్ట్ చేసేటప్పుడు కొన్ని కనీస నిబంధనలు పాటించాలి. మోడ్రన్ బట్టలు వేసుకొని శరీరం చూపిస్తానంటే నేను సహించను. అలాంటి వారికి సపోర్ట్ చేయను’’ అని ఆమె అన్నారు. ఇంద్రజ చేసిన ఈ వ్యాఖ్యలు ఇప్పుడు ఆన్‌లైన్‌లో వైరల్ అవుతున్నాయి. కొందరు ఆమె మాటలు నూటికి నూరు శాతం నిజమని మద్దతు తెలుపుతుండగా, మరికొందరు ఇది వ్యక్తిగత స్వేచ్ఛను హరించడమే అని విమర్శిస్తున్నారు. మొత్తం మీద శివాజీ మొదలుపెట్టిన ఈ వస్త్రధారణ చర్చ, ఇంద్రజ వ్యాఖ్యలతో మరోసారి ఇండస్ట్రీలో సెన్సేషన్ క్రియేట్ చేస్తోంది. ఈ ఇష్యూపై సెలబ్రిటీల మధ్య జరుగుతున్న చర్చ ఎటు దారితీస్తుందో చూడాలి.