విజయ్, త్రిష రిలేషన్‌పై హింట్ ఇచ్చిన బాడీ గార్డ్.. సమయం ఆసన్నమైందంటూ సెన్సేషనల్ పోస్ట్

దిశ, సినిమా: కోలీవుడ్ స్టార్ హీరోగా, రాజకీయ నాయకుడిగా వెలుగుతున్న దళపతి విజయ్ (Thalapathi Vijay)వ్యక్తిగత జీవితం ఇప్పుడు పెను సంచలనంగా మారింది. గత కొంతకాలంగా విజయ్, నటి త్రిష మధ్య ఏదో ఉందంటూ వస్తున్న వార్తలు, విజయ్ భార్య సంగీత చెన్నై కోర్టులో విడాకుల పిటిషన్ దాఖలు చేయడంతో నిజమేనని నమ్ముతున్నారు. ఈ వ్యవహారం ఇప్పుడు సోషల్ మీడియాలో చర్చకు దారితీస్తోంది. విజయ్ భార్య సంగీత, చెంగల్పట్టు జిల్లా ఫ్యామిలీ కోర్టులో దాఖలు చేసిన పిటిషన్‌లో తన భర్తపై సంచలన ఆరోపణలు చేశారు. 2021 నుండి విజయ్ తనతో ఎమోషనల్‌గా దూరంగా ఉంటున్నారని, ఒక నటితో వివాహేతర సంబంధం పెట్టుకున్నారని ఆమె పేర్కొన్నారు. తనను మానసిక వేదనకు గురిచేస్తూ, ఇంట్లోనే తనను నిర్లక్ష్యం చేస్తున్నారని ఆమె ఆరోపించారు. తమ పిల్లలు జేసన్ సంజయ్, దివ్య సాషాలకు కూడా తండ్రి ప్రవర్తన వల్ల ఇబ్బందులు ఎదురవుతున్నాయని సంగీత ఆవేదన వ్యక్తం చేసినట్లు సమాచారం.

1999లో ఘనంగా జరిగిన వీరి వివాహం, ఇప్పుడు ముగింపు దశకు చేరుకోవడం అభిమానులను షాక్‌కు గురిచేస్తోంది. వివాదం ముదురుతున్న సమయంలోనే, చెన్నైలో జరిగిన ఏజీఎస్ ప్రొడ్యూసర్ కల్పతి సురేష్ కుమారుడి వివాహ రిసెప్షన్‌కు విజయ్, త్రిష కలిసి హాజరయ్యారు. వీరిద్దరూ ఒకేసారి వేడుకలోకి రావడంతో, వారి మధ్య ఉన్న బంధం గురించి వస్తున్న రూమర్లకు మరింత బలం చేకూరినట్లయింది. వీరిని చూసిన నెటిజన్లు వీరు నిజంగానే కలిసి ఉన్నారా? అంటూ సోషల్ మీడియాలో పలు రకాలుగా చర్చించుకుంటున్నారు. ఈ క్రమంలో.. తాజాగా, విజయ్ బాడీగార్డ్ అరుణ్ సురేష్ చేసిన ఇన్‌స్టాగ్రామ్ పోస్టులు నెట్టింట హాట్ టాపిక్‌గా మారాయి. ‘‘అన్ని రూమర్లకు చెక్ పెట్టే సమయం ఆసన్నమైంది’’ అనే క్యాప్షన్ జత చేయడంతో వీరిద్దరి రిలేషన్‌పై హింట్ ఇచ్చినట్లుగా నెటిజన్లు భావిస్తున్నారు. దీంతో పాటు విజయ్ 'హార్ట్ సైన్' చూపిస్తున్న ఫోటోను షేర్ చేస్తూ, దానికి విజయ్-త్రిషల సూపర్ హిట్ సాంగ్ ‘కొక్కరకో’ను జత చేయడం చర్చనీయాంశమైంది.