ఓటీటీలోకి రాబోతున్న ఎమోష‌న‌ల్ ల‌వ్ అండ్ ఫ్యామిలీ డ్రామా.. స్ట్రీమింగ్ తేదీ ఖరారు

దిశ, సినిమా: ఎప్ప‌టిక‌ప్పుడు కొత్త సినిమాలు, సిరీస్‌ల‌తో వైవిధ్య‌మైన కంటెంట్‌ను ప్రేక్ష‌కుల‌కు అందిస్తూ దేశంలోనే టాప్ ఓటీటీ మాద్య‌మాల్లో ఒక‌టిగా గుర్తింపు సంపాదించుకున్న జీ 5.. మ‌రోసారి త‌న విల‌క్ష‌ణ‌త‌ను చాటుకుంటూ కొత్త సినిమా ‘బ్యూటీ’తో ప్రేక్ష‌కుల‌కు అందిస్తోంది. డిఫ‌రెంట్ మూవీస్‌లో న‌టిస్తూ మెప్పిస్తోన్న అంకిత్ కొయ్య(Ankit Koyya) హీరోగా, నిల‌ఖి పాత్రా(Nilakhi Patra) హీరోయిన్‌గా న‌టించిన ఈ చిత్రం జీ 5లో జ‌న‌వ‌రి 2 నుంచి స్ట్రీమింగ్ కానుందని అధికారిక ప్రకటన విడుదల చేసింది. హృద‌యాన్ని హ‌త్తుకునే క్యూట్ ల‌వ్‌స్టోరీ ఓ వైపు.. కూతురిపై అప‌రిమిత‌మైన ప్రేమను చూపించే తండ్రి భావోద్వేగం మ‌రో వైపు.. ఈ సంఘ‌ర్ష‌ణ‌లో క‌థ ఎలాంటి మ‌లుపులు తీసుకుంద‌నే ఆస‌క్తిక‌ర‌మైన మ‌లుపులున్న క‌థాంశంతో ‘బ్యూటీ’ (Beauty)సినిమా రూపొందింది. సెప్టెంబ‌ర్ 15న విడుద‌లైన ఈ చిత్రం థియేట‌ర్స్‌లో ప్రేక్ష‌కుల ప్ర‌శంస‌ల‌ను అందుకుని ఇప్పుడు జీ 5లో జ‌న‌వ‌రి 2 నుంచి అంద‌రికీ అందుబాటులోకి రానుంది.

స్టోరీ విషయానికొస్తే.. అలేఖ్య‌ (నిల‌ఖి పాత్రా), అర్జున్ (అంకిత్ కొయ్య‌) ప్రేమించుకుంటారు. అలేఖ్య తండ్రి నారాయ‌ణ (వీకే న‌రేష్‌) ఓ క్యాబ్ డ్రైవ‌ర్‌. కూతురంటే మాట‌ల్లో చెప్పలేని ప్రేమ‌. కూతురికి బ‌ర్త్ డే గిఫ్ట్‌గా టూ వీల‌ర్ బండిని కొనిస్తాన‌ని ప్రామిస్ చేస్తాడు. అలాగే అర్జున్ కూడా ఆమెకు బండి కొనిస్తాన‌ని ప్రామిస్ చేస్తాడు. తండ్రి మాటపై నిల‌బ‌డ‌క‌పోవ‌టంతో అలేఖ్య తండ్రితో గొడ‌వ‌ప‌డి వెళ్లిపోతుంది. అర్జున్‌, నారాయ‌ణ ఆమె నిర్ణ‌యంతో ఎలాంటి ఇబ్బందులు ప‌డ్డారు. కోపంతో తీసుకున్న నిర్ణ‌యం అలేఖ్య‌ను ఎలాంటి ఇబ్బందుల్లో ప‌డేసింది..నారాయ‌ణ కూతుర్ని కాపాడుకోవ‌టానికి ఏం చేస్తాడు? చివ‌ర‌కు ఆమె ఎలా బ‌య‌ట‌ప‌డింద‌నేదే సినిమా క‌థాంశం.