కోట్లలో అడ్వాన్సులు వెనక్కి ఇచ్చేసిన నటి.. ఆదిత్య చోప్రా ఒక్క మాటతో సీన్ రివర్స్!

దిశ, సినిమా: బాలీవుడ్ సీనియర్ నటి దివ్య దత్తా తన కెరీర్ ఆరంభంలో తీసుకున్న ఒక సాహసోపేతమైన నిర్ణయం గురించి తాజాగా పంచుకున్న విషయాలు నెట్టింట వైరల్ అవుతున్నాయి. 'వీర్ జారా' వంటి బ్లాక్ బస్టర్ హిట్ తర్వాత అవకాశాలు వెల్లువలా రావడంతో, ఆమె ఏకంగా 20 సినిమాలకు ఒకేసారి సంతకం చేశారట. అయితే, ఈ విషయం తెలిసిన స్టార్ ప్రొడ్యూసర్ ఆదిత్య చోప్రా స్పందించిన తీరు తన కళ్లు తెరిపించిందని, ఆ ఒక్క మాటతో తన నిర్ణయాన్ని మార్చుకున్నానని ఆమె వెల్లడించారు. ‘‘నాకు 16 ఏళ్ల వయసున్నప్పుడే నటిగా నా ప్రయాణం మొదలైంది. అయితే నా కెరీర్‌ను పూర్తిగా మలుపు తిప్పిన సినిమా మాత్రం ‘వీర్ జారా’. ఆ సినిమా ఎంత పెద్ద హిట్ అయ్యిందంటే.. నాకు ఒక్కసారిగా అవకాశాలు వెల్లువలా వచ్చాయి. ఆ ఆనందంలో ఏమీ ఆలోచించకుండా ఏకంగా 20 సినిమాలకు సంతకం చేసేశాను. ఒకరోజు నేను ఆదిత్య చోప్రాని కలవడానికి వెళ్లాను. ఇద్దరం కలిసి చాయ్ తాగుతూ మాట్లాడుకుంటున్న సమయంలో.. 'నేను ఒకేసారి 20 సినిమాలకు సైన్ చేశాను' అని చాలా సంతోషంగా ఆయనకు చెప్పాను.కానీ, నా మాట విన్నాక ఆయన ముఖంలో ఎలాంటి రియాక్షన్ లేదు.

'ఇంత మంచి వార్త చెప్తే మీలో చలనం లేదేంటి?' అని నేను అడిగాను. అప్పుడు ఆయన నన్ను ఒక ప్రశ్న వేశారు.. 'నీకు ఏమైనా డబ్బు అవసరం ఉందా? ఆర్థికంగా ఇబ్బందుల్లో ఉన్నావా?' అని అడిగారు. నేను లేదని చెప్పాను. 'అలాంటప్పుడు ఒకేసారి ఇన్ని సినిమాలు ఎందుకు చేస్తున్నావు? నువ్వు మంచి నటివి, ఆచితూచి అడుగులు వేయడం నేర్చుకో' అని సలహా ఇచ్చారు. ఆ మాటలు విన్నప్పుడు నాకు నిజంగా జ్ఞానోదయం అయింది. ఆయన చెప్పింది వినాలా వద్దా అనేది నా ఇష్టం.. కానీ నేను బాగా ఆలోచించాను. వెంటనే ఆ 20 సినిమాల నుండి తప్పుకోవాలని నిర్ణయించుకున్నాను. తీసుకున్న అడ్వాన్సులు కూడా వెనక్కి ఇచ్చేశాను. అప్పటి నుండి నాకు నిజంగా నచ్చిన, మనసుకు నచ్చిన పాత్రలను మాత్రమే చేసుకుంటూ వస్తున్నాను. ఇక పెళ్లి విషయానికొస్తే.. నాకంటూ ఒక కరెక్ట్ పర్సన్ దొరికితేనే చేసుకుంటాను, లేదంటే ఇలాగే సింగిల్‌గా ఉండిపోతాను. నాకు నచ్చినట్లుగా, ప్రశాంతంగా బతకడమే నాకు ఇష్టం’’ అని చెప్పుకొచ్చింది. ఈ విషయం తెలుసుకున్న నెటిజన్లు ఆశ్చర్యపోతున్నారు.