మహాభారత వీరుడి కథలో సల్మాన్ ఖాన్‌కు పవర్ ఫుల్ రోల్.. చర్చనీయాంశంగా మారిన పోస్ట్!

దిశ, సినిమా: బాలీవుడ్ స్టార్ హీరో సల్మాన్ ఖాన్ వరుస సినిమాలతో ఫుల్ బిజీగా గడుపుతున్నారు. ప్రతిష్టాత్మక చిత్రం ‘మాతృభూమి’తో పాటు.. వంశీ పైడిపల్లి దర్శకత్వంలో ఓ భారీ ప్రాజెక్ట్ చేస్తున్నారు. దిల్ రాజు నిర్మించనున్న ఈ చిత్రంలో లేడీ సూపర్ స్టార్ నయనతార హీరోయిన్‌గా నటిస్తుండగా.. భారీ అంచనాలు నెలకొన్నాయి. షూటింగ్ శరవేగంగా జరుపుకుంటున్న ఈ మూవీ వచ్చే ఏడాది ఈద్ పండుగ కానుకగా విడుదల కానుంది. ఇదిలా ఉంటే.. తాజాగా, సల్మాన్ మరో భారీ ప్రాజెక్ట్‌కు గ్రీన్ సిగ్నల్ ఇచ్చినట్లు సోషల్ మీడియాలో పలు పోస్టులు వైరల్‌గా మారాయి. దర్శకుడు రాకేష్ ఓంప్రకాష్ మెహ్రా చాలా కాలంగా ప్లాన్ చేస్తున్న పౌరాణిక చిత్రం ‘కర్ణ’ సినిమాలో సల్మాన్ ఖాన్ నటించబోతున్నట్లు టాక్.

మహాభారతంలోని అత్యంత శక్తివంతమైన, భావోద్వేగభరితమైన పాత్ర అయిన వీరుడు కర్ణుడి కథ ఆధారంగా ఈ సినిమా తెరకెక్కనుంది. ప్రస్తుతం ఈ ప్రాజెక్ట్‌కు సంబంధించిన చర్చలు చివరి దశకు చేరుకున్నాయని, అధికారిక ప్రకటన కూడా త్వరలోనే వచ్చే అవకాశం ఉందని సమాచారం. ఈ చిత్రాన్ని రెండు భాగాలుగా అత్యంత భారీ బడ్జెట్‌తో, విజువల్ వండర్‌గా రూపొందించేందుకు దర్శకుడు ప్లాన్ చేస్తున్నట్లు తెలుస్తోంది. ఇప్పటివరకు ఎక్కువగా యాక్షన్, కమర్షియల్ మాస్ రోల్స్ చేసిన సల్మాన్.. మొదటిసారి ఇలాంటి ఒక పౌరాణిక పాత్రలో కనిపిస్తే బాక్సాఫీసు షేక్ అవడం ఖాయమని నెటిజన్లు చర్చించుకుంటున్నారు. అయితే ఈ మైథలాజికల్ ఎపిక్ సినిమాపై సల్మాన్ ఫ్యాన్స్‌లో అప్పుడే భారీ అంచనాలు నెలకొన్నాయి.