ముఖచిత్రం

ఇప్పటి ముఖంలా

రేపటి నా ముఖం ఉండకపోవచ్చు

గాట్లో.. గాయాలో

ఆత్మ విశ్వాసాన్ని పరిహసిస్తూ

నా ముఖ వర్చస్సును

చిన్నాభిన్నం చేయవచ్చు

ఒక అసంకల్పిత ఘటన

పెదాల పైన నవ్వును

కళ్ళల్లోని వెలుగును

నిర్ధాక్షిణ్యంగా చిదిమివేయవచ్చు

అయితేనేం.. ఆ ముఖం

తాలూకు మనసు ఉంటుంది కదా..

అదెప్పుడూ స్వచ్ఛమైనదే!

మాయలు మచ్చలు లేని

వెన్నెల తరగ లాంటిదే

వాగ్దానాన్ని మరువని

చేతిలో వేసిన చేయి లాంటిదే!

ఇంకా.. ఆ మనసెప్పుడూ

మాసిపోని పువ్వులా

ముఖంపై పరిమళిస్తుంది

జ్ఞాపకాలను గుండెల్లో దాచుకొని

ఆత్మీయంగా పలవరిస్తుంది

తన మునివేళ్ళతో

ముఖాన్ని తడుముతూ

ఒడిలోకి చేర్చుకొని

వెచ్చటి ఓదార్పునిస్తుంది

-సునీత గంగవరపు

94940 84576