ఏడుపంటేనే సుఖం!

నాకేడుపంటే చాలా ఇష్టం

కనీసం అప్పుడప్పుడైనా

ఏడవాలనుకుంటాను

అందులోని సుఖం

అనుభవిస్తేనే కానీ అర్థం కాదు

లోలోన గడ్డకట్టుకుపోయిన

దుఃఖపు కొండల్ని

గుండెల్ని బాదుకుంటూనైనా...

కన్నీళ్ళలా కరిగించినప్పుడే

మనసుకెంతో హాయనిపిస్తుంది!

బాధలోనూ అంతులేని

సుఖం దాగుంటుందనీ...

ఒక్కసారిగా గుండెని పురేసి

పిండేసినట్టుగా - శూన్యత

కళ్ళ ముందు కనిపిస్తూంటే...

ఉన్నపళంగా ఊపిరి ఆగి

వేగం పెంచి కొట్టుకుంటుంటే...

గుండె ఆ బాధ తట్టుకోలేక

తల్లడిల్లిన వైనం చూస్తూంటే...

అమాంతంగా అతిమధురాన్ని

నేరుగా నా గుండెల్లోకి

ఒంపినట్టే ఉంది!

నిజానికి - సుఖం అంటే అది!

స్వర్గం అంటే అది!

-బాలాజీ పోతుల

81792 83830