తలవొంచని వాక్యం

ఈ పగటి సంధ్యలో

గట్టిగా ఎవ్వరూ మాట్లాడలేక పోవచ్చు

పబ్లిగ్గా ఎవ్వరూ ప్రశ్నించలేకపోవొచ్చు

బహిరంగంగా ఎవ్వరూ

కలలు కనలేకపోవొచ్చు

కలల్లో వణుకుతూ

వాస్తవాల్లో వణుకుతూ

బెరుకుకి పిరికిమందు వేసి

నడుస్తూ నిద్రపోయేవాళ్ళే

అందరూ కావొచ్చు

ఏ సుడినీ ఖాతరు చేయని

ముసిడికొయ్య లాంటి

మొరుడొకటి కూడా వుంటుంది!

వరదను ధిక్కరిస్తూ, బురదను చీలుస్తూ

తలెత్తి లేచే గడ్డిపరకలా

తుపాను తీరంలో

ఎదురేగి నిలబడుతుంది

ప్రశ్నించే గొంతుకగా

ఒక నిక్కచ్చి కవితా వాక్యం!

- కంచరాన భుజంగరావు

94415 89602