Silver : నకిలీ వెండిని ఈ చిన్న ట్రిక్ తో కనిపెట్టవచ్చు

దిశ, వెబ్ డెస్క్ : ప్రస్తుతం నడుస్తున్న పెళ్ళిళ్ళ సీజన్ దృష్టిలో ఉంచుకొని ధరలు అధికంగా ఉన్నప్పటికీ ప్రజలు భారీగా బంగారం, వెండి కొనుగోలు చేస్తున్నారు. అదేవిధంగా పెట్టుబడి కోసం కూడా వీటిని కొనుగోలు చేస్తున్నారు, తద్వారా భవిష్యత్తులో మంచి రాబడి పొందవచ్చు. కానీ నేడు మార్కెట్లో అసలైన వాటి పేరుతో కల్తీ బంగారం, వెండి కూడా అమ్ముతున్నారు. బంగారంపై హాల్ మార్క్ చూసి అది అసలైనదా.. నకిలీదా అని గుర్తు పట్టవచ్చు. మరి నకిలీ వెండిని ఎలా గుర్తించాలి. చూడటానికి అసలైన వెండిలాగే కనిపిస్తుంది. కానీ దీనిలో వెండి శాతం చాలా తక్కువ లేదా అసలే ఉండదు.

న‌కిలీ వెండిని గుర్తు ప‌ట్టే ఓ ట్రిక్‌కి తెలుసుకుంటే సులభంగా గుర్తుపట్టవచ్చు. దానికోసం ఎక్కడికో వెళ్ళే అవసరం లేదు. ఇంట్లోనే కొన్ని ఐస్ ముక్కలను ఉపయోగించి అసలైన వెండిని గుర్తించవచ్చు. ఇందుకోసం ముందుగా ఒక ప్లేట్‌లో కొన్ని ఐస్ ముక్కలను తీసుకొని దానిపై వెండి ఆభరణం లేదా నాణెం ఉంచండి. వెండి అసలైనదైతే అది ఐస్‌కు అతుక్కుపోతుంది. అదే సమయంలో, నకిలీ వెండి ఐస్‌కు అతుక్కుపోదు. ఈ విధంగా మీరు అసలైన లేదా నకిలీ వెండిని గుర్తించవచ్చు.

ఇక న‌కిలీ వెండి గుర్తించ‌డానికి ఇత‌ర మార్గాలు కూడా అందుబాటులో ఉన్నాయి. అవేంటో ఇప్పుడు తెలుసుకుందాం..

* అసలైన వెండిపై హాల్‌మార్క్‌, స్టాంప్ ఉంటుంది. అసలైన వెండిపై 925, 999 లేదా స్టెర్లింగ్ అని రాసి ఉంటుంది. 925 అంటే 92.5% శుద్ధ వెండి అని అర్థం.

* అసలైన వెండిపై లైటర్ లేదా అగ్గిపుల్ల వెలిగిస్తే అది నల్లగా మారదు. నకిలీ వెండి వేడికి పసుపు లేదా మచ్చలు వస్తాయి.

* అసలైన వెండిని గుర్తించడానికి మీరు మాగ్నెట్ పరీక్ష కూడా చేయవచ్చు. వెండి అయస్కాంతానికి అతుక్కుపోదు. వెండిలో కల్తీ ఉంటే అది అయస్కాంతానికి అతుక్కుపోతుంది.

* అసలైన వెండిని పరీక్షించడానికి మీరు కొద్దిగా నీటిలో బ్లీచ్ పౌడర్, ఉప్పు కలిపి ఆ ద్రావణంలో వెండిని వేయండి. కొంత సమయం తర్వాత అసలైన వెండిపై తేలికపాటి నల్ల మచ్చ రావచ్చు, అయితే నకిలీ వెండిపై ఎటువంటి ప్రభావం ఉండదు.

* అసలైన వెండిని మృదువైన వస్త్రంతో రుద్దినప్పుడు, అది నెమ్మదిగా మెరుస్తుంది, అయితే నకిలీ వెండి పై పొర ఊడిపోతుంది అలాగే రంగు మారడం ప్రారంభమవుతుంది.

గమనిక : పైవార్తలోని సమాచారం ఇంటర్నెట్ ఆధారంగా సేకరించబడినది, దిశ దీనిని ధృవీకరించలేదు. పై వార్తలో మీకు అనుమానాలు ఉంటే నిపుణులను సంప్రదించగలరు.