యువతలో పెరిగిపోతున్న ఊబకాయం.. 30 ఏండ్లకే ఆ సమస్యలు!

దిశ, ఫీచర్స్ : అధిక బరువు లేదా ఊబకాయం(Obesity) వంటి సమస్యలు ఒకప్పుడు చాలా తక్కువమందిలో కనిపించేవి. ముఖ్యంగా 30 ఏండ్లు దాటినవారిలోనే అధికంగా ఉండేది. కానీ ఇటీవల పరిస్థితులు మారిపోతున్నాయి. ఊబకాయం సమస్య రోజు రోజుకూ పెరుగుతుండటమే కాకుండా, 30 ఏండ్లలలోపు యువతను సైతం ఇది వేధిస్తోందని ఫిట్‌నెస్ నిపుణులు అంటున్నారు. నిశ్చల జీవనశైలి, మానసిక ఒత్తిళ్లే ఇందుకు ప్రధాన కారణమని చెబుతున్నారు.

పదేళ్ల క్రితంతో పోలిస్తే ప్రస్తుతం 57% మంది ప్రజలు, ముఖ్యంగా యువత అధిక ఒత్తిడిని ఎదుర్కొంటున్నారు. ఇందులో 47 % పైగా తాము మెంటల్‌స్ట్రెస్ కారణంగానే అధిక బరువు పెరుగుతున్నామని భావిస్తున్నట్లు అధ్యయనాలు చెబుతున్నాయి. ఇక అధిక ఒత్తిడికి గల కారణాల విషయానికి వస్తే ప్రతీ 10 మందిలో 4 ఇనాక్టివ్ సిట్టింగ్, ఓవర్ థింకింగ్ వల్ల దీని బారినపడుతున్నట్లు నిపుణులు చెబుతున్నారు. ఇంకా 30% మంది యువతలో అయితే భోజనం సమయానికి తినకపోవడం, సరైన పోషకాలు అందకపోవడం కారణంగా ఒత్తిడి, ఆందోలన, ఊబకాయం సమస్యలు పెరుగుతున్నాయి. ఇవి వారి సామాజిక జీవితాలపై కూడా ప్రభావం చూపుతున్నాయి. ముఖ్యంగా 44% మందిలో వర్క్ అండ్ లైఫ్‌పై ప్రతికూల ప్రభావం చూపుతున్నాయి. అలాగే డబ్బు సంపాదించే క్రమంలో 36% మంది, ఉద్యోగాలు చేసేచోట 34% మంది తరచుగా స్ట్రెస్‌కు గురవుతున్నారు.

అధిక ఒత్తిడితో, శారీరక శ్రమ తగ్గడంతో అధిక బరువు పెరుగుతున్నామని భావిస్తున్న ప్రతీ నలుగురిలో ఒకరు ఈ సమస్య నుంచి బయటపడతామా లేదా అని కూడా నిరంతరం ఆందోళన చెందుతున్నట్లు నిపుణులు పేర్కొంటున్నారు. అలాగే 46% మంది ఒత్తిడి కారణంగా నిద్రను, 37% మంది ఏకాగ్రతను కోల్పోతున్నారు. 30 % మందిలో బ్లడ్ ప్రెజర్ పెరుగుతుండగా, ప్రతీ 10 మందిలో నలుగురు క్రానిక్ స్ట్రెస్‌ను అనుభవిస్తున్నారు. ఇక అనేకమంది ఒత్తిడికారణంగా సాధారణంకంటే 5 నుంచి 7 కిలలో బరువు పెరుగుతున్నారు. కాబట్టి ఊబకాయం సమస్య నుంచి బయటపడాలంటే.. ఒత్తిడిని కూడా తగ్గించుకోవాలని, ఒత్తిడి రహిత జీవనశైలిని, ఆహారపు అలవాట్లను అలవర్చుకోవాలని, తరచుగా శారీరక శ్రమ కలిగి ఉండేలా చూసుకోవాలని ఆరోగ్య నిపుణులు సూచిస్తున్నారు.

*గమనిక : పైవార్తలోని సమాచారం ఇంటర్నెట్ ఆధారంగా సేకరించబడింది. మీ అవగాహన కోసం మాత్రమే అందిస్తున్నాం. అనుమానాలు ఉంటే నిపుణులను సంప్రదించగలరు.