ఏ వయసు నుంచి ఏ వయసు వరకూ వ్యాయామం చేస్తే బీపీ కంట్రోల్ లో ఉంటుంది?

దిశ, వెబ్‌డెస్క్: హృదయ ఆరోగ్యాన్ని కాపాడుకోవడానికి, వృద్ధాప్యంలో అధిక రక్తపోటు (Hyper Tension)ను నివారించడానికి యవ్వనంలో (18-40 సంవత్సరాలు) క్రమం తప్పకుండా వ్యాయామం చేయడం చాలా ముఖ్యమని American Journal of Preventive Medicine అధ్యయనం చెబుతోంది. అమెరికాలోని నాలుగు నగరాల్లో 5,100 మందిపై 30 సంవత్సరాల పాటు నిర్వహించిన ఈ పరిశోధన.. వ్యాయామ అలవాట్లు, ధూమపానం, మద్యపానం వంటి అంశాలను పరిశీలించింది.

ఈ అధ్యయనం ప్రకారం.. చాలా మంది యవ్వనంలో (18-40 సంవత్సరాలు) వ్యాయామం చేసినా, వయసు పెరిగే కొద్దీ ఈ అలవాటు తగ్గుతుంది. దీని వల్ల 40 ఏళ్ల తర్వాత రక్తపోటు సమస్యలు పెరుగుతాయి. యవ్వనంలో వారానికి 5 గంటల మితమైన వ్యాయామం (సాధారణంగా సిఫారసు చేసే 2.5 గంటల కంటే రెట్టింపు) చేసిన వారిలో రక్తపోటు సమస్యలు గణనీయంగా తక్కువగా కనిపించాయి. ముఖ్యంగా.. 60 ఏళ్ల వరకు వ్యాయామం కొనసాగించిన వారిలో ఈ ప్రయోజనం ఎక్కువగా ఉంది.

అయితే.. సామాజిక, ఆర్థిక కారణాల వల్ల చాలా మందికి వ్యాయామం కొనసాగించడం కష్టంగా ఉంటుంది. ఉదాహరణకు హైస్కూల్ తర్వాత కళాశాల, ఉద్యోగం, కుటుంబ బాధ్యతల వల్ల వ్యాయామానికి సమయం తగ్గుతుంది. అధ్యయనం ఒక ముఖ్యమైన విషయాన్ని కూడా చూపించింది. నల్లజాతి వ్యక్తులు, ముఖ్యంగా నల్లజాతి మహిళలు, సామాజిక, ఆర్థిక అడ్డంకుల కారణంగా వ్యాయామం కొనసాగించడంలో ఎక్కువ ఇబ్బందులు ఎదుర్కొంటారు. 45 ఏళ్ల వయసులో నల్లజాతి మహిళల్లో రక్తపోటు రేటు ఎక్కువగా ఉంది. అయితే శ్వేతజాతి మహిళల్లో ఇది తక్కువగా కనిపించింది. 60 ఏళ్ల నాటికి నల్లజాతి పురుషులు, మహిళల్లో 80-90 శాతం మందికి రక్తపోటు ఉండగా, శ్వేతజాతి పురుషుల్లో 70 శాతం, శ్వేతజాతి మహిళల్లో సగం మందికి మాత్రమే ఈ సమస్య ఉంది.

అధిక రక్తపోటు.. గుండెపోటు, స్ట్రోక్, వృద్ధాప్యంలో డిమెన్షియా వంటి తీవ్రమైన సమస్యలకు దారితీస్తుంది. క్రమం తప్పకుండా వ్యాయామం చేయడం ద్వారా దీనిని నియంత్రించవచ్చు. యవ్వనంలో ఎక్కువ వ్యాయామం చేయడం, దాన్ని మధ్య వయసు వరకు కొనసాగించడం రక్తపోటు నివారణకు అవసరమని శాస్త్రవేత్తలు సూచిస్తున్నారు. రోజూ నడక, యోగా, లేదా మితమైన వ్యాయామం చేయడం హృదయ ఆరోగ్యాన్ని కాపాడుతుంది.