Virginity Tests: భార్యకు కన్యత్వ పరీక్ష చేయించాలని భర్త డిమాండ్..హైకోర్టు ఏం చెప్పిందంటే?

దిశ, వెబ్ డెస్క్: Virginity Tests: కన్యత్వ పరీక్షలు నిర్వహించడం రాజ్యాంగ విరుద్ధమని ఛత్తీస్‌గఢ్ హైకోర్టు పునరుద్ఘాటించింది. ఇటువంటి ఆచారాలు భారత రాజ్యాంగంలోని ఆర్టికల్ 21ని ఉల్లంఘిస్తాయని నొక్కి చెప్పింది. ఇది గౌరవ హక్కుతో సహా జీవించే హక్కు, వ్యక్తిగత స్వేచ్ఛకు హామీ ఇస్తుందని పేర్కొంది.

భార్యభర్తల మధ్య వివాదంపై ఛత్తీస్ గఢ్ హైకోర్టు తన తీర్పును వెలువరించింది. తన భర్తను నపుంసకుడుగా ప్రకటిస్తూ ఒక మహిళ ఫ్యామిలీకోర్టులో పిటిషన్ దాఖలు చేశారు. మహిళ పిటిషన్ కు ప్రతిస్పందనగా భర్త తన భార్య స్వభావాన్ని ప్రశ్నించాడు. ఆమెకు కన్యత్వ పరీక్ష చేయించాలని డిమాండ్ చేశాడు. దీనికి ఫ్యామిలీకోర్టు అనుమతి ఇవ్వడానికి నిరాకరించడంతో, భర్త హైకోర్టును ఆశ్రయించాడు. ఈ కేసులో ఛత్తీస్‌గఢ్ హైకోర్టు తన తీర్పును వెలువరించింది. ఏ మహిళనూ కన్యత్వ పరీక్ష చేయించుకోవాలని బలవంతం చేయరాదని కోర్టు పేర్కొంది. ఇది రాజ్యాంగంలోని ఆర్టికల్ 21 ఉల్లంఘన, ఇది మహిళల గౌరవం, జీవితం స్వేచ్ఛను కాపాడుకునే ప్రాథమిక హక్కును నిర్ధారిస్తుందని పేర్కొంది.

ఒక మహిళకు కన్యత్వ పరీక్ష నిర్వహించాలని ఆదేశించడం ప్రాథమిక హక్కులకు విరుద్ధమే కాకుండా సహజ న్యాయ సూత్రాలను కూడా విస్మరిస్తున్నదని కోర్టు పేర్కొంది. ఆర్టికల్ 21 ప్రాథమిక హక్కులను రక్షిస్తుంది. రాజ్యాంగ హక్కులను ఎట్టి పరిస్థితుల్లోనూ ఉల్లంఘించరాదని హైకోర్టు న్యాయమూర్తి అరవింద్ కుమార్ వర్మ కోర్టు పేర్కొంది. తన భార్య వేరే వ్యక్తితో అక్రమ సంబంధం కలిగి ఉందని భర్త కోర్టులో ఆరోపించాడు. కాబట్టి కన్యత్వ పరీక్షను అనుమతించాలని కోరాడు. అంతకుముందు ఫ్యామిలీ కోర్టు 2024 అక్టోబర్ 15న భర్త పిటిషన్‌ను తిరస్కరించింది. దీని తర్వాత భర్త హైకోర్టులో పిటిషన్ దాఖలు చేశాడు.

తన భర్త నపుంసకుడు అని తనతో కలిసి ఉండటానికి నిరాకరించాడని భార్య ఆరోపించింది. భర్త నపుంసకత్వ ఆరోపణలను నిరాధారంగా నిరూపించాలనుకుంటే, అతను స్వయంగా వైద్య పరీక్షలు చేయించుకోవచ్చని హైకోర్టు పేర్కొంది. దీనికి సంబంధించిన ఇతర ఆధారాలు ఏవైనా ఉంటే, అతను దానిని కోర్టులో సమర్పించవచ్చు.. కానీ భార్య కన్యత్వాన్ని పరీక్షించడానికి అతనికి అనుమతి లేదని కోర్టు పేర్కొంది. పిటిషనర్ డిమాండ్ పూర్తిగా రాజ్యాంగ విరుద్ధమని కోర్టు పేర్కొంది. రాజ్యాంగంలోని ఆర్టికల్ 21 మహిళల గౌరవాన్ని కాపాడుతుంది. వ్యక్తిగత స్వేచ్ఛ హక్కు అనేది మార్పులేని హక్కు.. దానిని ఏ విధంగానూ దెబ్బతీయలేము. ఇరు వర్గాలు చేసిన ఆరోపణలు దర్యాప్తు చేయవలసిన విషయం.. ఆ తర్వాతే కొంత నిర్ధారణకు రాగలం. ఫ్యామిలీ కోర్టు ఆదేశం చట్టవిరుద్ధం కాదు లేదా వికృతమైనది కాదని కోర్టు తెలిపింది.

ఛత్తీస్ గఢ్ లోని రాయ్ గఢ్ జిల్లాకు చెందిన ఈ జంటకు 2023 ఏప్రిల్ 30న వివాహం జరిగింది. ఆమె తన భర్తకు వ్యతిరేకంగా జూలై 2, 2024న రూ. 20,000 భరణం డిమాండ్ చేస్తూ పిటిషన్ దాఖలు చేసింది. భర్త నపుంసకుడు అని పిటిషన్‌లో ఆరోపించారు. అయితే తన భార్యకు వివాహేతర సంబంధం ఉందని భర్త పిటిషన్ దాఖలు చేశాడు. ఇరువురి వాదనలు విన్న కోర్టు ఈ తీర్పునిచ్చింది.