కొత్త ఆఫీసులోకి FCDA.. ఫ్యూచర్ సిటీలో వేగంగా నిర్మాణ పనులు

దిశ, తెలంగాణ బ్యూరో :మీర్​ఖాన్​ పేటలోని ఫ్యూచర్ సిటీ డెవలప్మెంట్ అథారిటీ(ఎఫ్సీడీఏ) ఆఫీసు నిర్మాణ పనులు శరవేగంగా జరుగుతున్నాయి. తెలంగాణ ఆవిర్భావ దినోత్సవం(జూన్ 2) రోజున సీఎం రేవంత్ రెడ్డి చేతుల మీదుగా ఆఫీసు ప్రారంభించనున్నట్టు తెలిసింది. కొత్త ఆఫీసు నుంచే కార్యకలాపాలను నిర్వహించాలని సీఎం నిర్ణయించినట్టు అధికారులు చెబుతున్నారు. 16వేల ఎస్ఎఫ్టీలో నిర్మిస్తున్న జీ+1 ఆఫీసు భవనానికి సంబంధించిన అన్ని రకాల పనులు పూర్తిచేసేందుకు అధికారులు చర్యలు తీసుకుంటున్నారు. అయితే ప్రస్తుతం నానక్ రాంగుడలోని హెచ్‌జీసీఎల్ ఆఫీసులో ఎఫ్సీడీఏ కార్యాలయాన్ని నిర్వహిస్తున్నారు.

2.11ఎకరాల్లో…

ఫ్యూచర్ సిటీలోని మీర్​ఖాన్​ పేటలో 7.29 ఎకరాల స్థలాన్ని ఎఫ్​సీడీఏకు కేటాయించారు. అందులో 2.11 ఎకరాల విస్తీర్ణంలో నిర్మిస్తున్న ఎఫ్​సీడీఏ భవనానికి ముఖ్యమంత్రి రేవంత్ రెడ్డి గతేడాది సెప్టెంబర్‌లో భూమి పూజ చేసిన విషయం తెలిసిందే. ఆఫీసును ఆధునాతన హంగులతో నిర్మించాలని అధికారులను సీఎం ఆదేశించారు. ఆఫీసు నిర్మాణానికి ప్రభుత్వం ఇప్పటికే రూ.19కోట్లు కేటాయించింది. నిర్మాణ పనులు వేగంగానే జరుగుతున్నాయని అధికారులు చెబుతున్నారు. దీంతోపాటు ఇప్పటికే ఎఫ్సీడీఏ పరిధిలో లేఅవుట్లు, బిల్డింగ్ పర్మిషన్లు సైతం జారీచేస్తున్నారు.