ప్రతి డివిజన్‌లోనూ కమలం వికసించాలి : నడ్డా
దిశ, వెబ్‌డెస్క్ : గ్రేటర్ హైదరాబాద్ మున్సిపల్ కార్పొరేషన్ ఎన్నికల్లో బీజేపీ తన ప్రచారాన్ని హోరెత్తిస్తోంది. బీజేపీ జాతీయ అధ్యక్షుడు జగత్ ప్రకాశ్ నడ్డా శుక్రవారం ఎన్నికల ప్రచారంలో భాగంగా రోడ్ షో నిర్వహిస్తున్నారు. నాగోల్ -కొత్తపేట మధ్యలో కొనసాగుతున్న ఎన్నికల ప్రచారంలో కేంద్ర మంత్రి కిషన్ రెడ్డి, తెలంగాణ బీజేపీ అధ్యక్షుడు బండి సంజయ్‌ పాల్గొన్నారు.
ఓ వైపు నగరంలో వర్షం పడుతున్నా బీజేపీ తన రోడ్ షోను కంటిన్యూ చేస్తోంది. ఈ సందర్భంగా జేపీ నడ్డా మాట్లాడుతూ.. గ్రేటర్ ఎన్నికల్లో బీజేపీకి ఓటు వేస్తే హైదరాబాద్ ను అభివృద్ధిలో ముందుకు తీసుకెళ్తామన్నారు. రాష్ట్రంలో టీఆర్ఎస్ పాలనపై వ్యతిరేకత మొదలైందని, అందుకు ప్రజల నుంచి వస్తున్న స్పందనే కారణమన్నారు. ఈ సారి ప్రతి డివిజన్ లోనూ కమలం వికసించాలని నడ్డా ఓటర్లకు పిలుపునిచ్చారు. గల్లీ ఎన్నికల కోసం ఢిల్లీ నేతలు వస్తున్నారని మంత్రి కేటీఆర్ పదేపదే చెబుతున్నారని, అందుకు బదులుగా తెలంగాణ ప్రజలు టీఆర్ఎస్ ప్రభుత్వాన్ని త్వరలోనే ఇంటికి సాగనంపుతారని విమర్శించారు.
