"ఈ సలా కప్ నమ్దే" ఇప్పుడు ఒక నినాదం కాదు.. ఆర్సీబీ చిరస్థాయి విజయ గాథ

దిశ, వెబ్‌డెస్క్: అహ్మదాబాద్‌లోని నరేంద్ర మోదీ స్టేడియంలో జూన్ 3, 2025 రాత్రి, లక్షలాది ఆర్సీబీ అభిమానుల గుండెలు ఉత్సాహంతో ఉప్పొంగాయి. రాయల్ ఛాలెంజర్స్ బెంగళూరు టీమ్ చివరకు ఐపీఎల్ 2025 టైటిల్‌ను గెలుచుకుంది. పంజాబ్ కింగ్స్‌తో జరిగిన ఫైనల్ మ్యాచ్‌లో 6 రన్స్ తేడాతో విజయం సాధించి 18 ఏళ్ల కలను నిజం చేసింది. కానీ ఈ విజయం ఒక రాత్రి కథ కాదు. ఇది నిరీక్షణ, నిరాశ, నిరంతర పోరాటంతో కూడిన ఒక భావోద్వేగం నుంచి వచ్చిన విజయం. ఆర్సీబీ నాలుగు సార్లు ఐపీఎల్ ఫైనల్స్‌కు చేరుకుంది. మూడు సార్లు ఓటమిని రుచి చూసి, నాల్గవసారి ట్రోఫీని అందుకుంది.

2009: జోహన్నెస్‌బర్గ్‌లో ఆరంభమైన పోరాటం

దక్షిణాఫ్రికాలో జరిగిన ఐపీఎల్ 2009 సీజన్‌లో ఆర్సీబీ తమ మొదటి ఫైనల్‌కు చేరుకుంది. డెక్కన్ ఛార్జర్స్‌తో వాండరర్స్ స్టేడియంలో జరిగిన ఈ మ్యాచ్‌లో ఆర్సీబీ అభిమానులు "ఈ సలా కప్ నమ్మదే" అనే నినాదంతో ఉత్సాహంగా ఉన్నారు. డెక్కన్ ఛార్జర్స్ 143/6 స్కోరు చేసింది. అనిల్ కుంబ్లే తన బౌలింగ్‌తో మెరిసినా.. ఛేజింగ్‌లో ఆర్సీబీ బ్యాటర్లు ఒత్తిడిలో కుప్పకూలారు. విరాట్ కోహ్లీ (7), రాస్ టేలర్ (27) ఔట్ కావడంతో ఆర్సీబీ 137/9 వద్ద ఆగిపోయింది. ఆండ్రూ సైమండ్స్ బౌలింగ్, హర్షల్ గిబ్స్ (53 నాటౌట్) బ్యాటింగ్ డెక్కన్‌ను విజయపథంలో నడిపించాయి. 6 రన్స్ తేడాతో ఓడిన ఆర్సీబీ అభిమానుల గుండెలు ముక్కలయ్యాయి. అయినా.. ఈ ఓటమి ఆర్సీబీకి ఒక కొత్త ఆశను ఇచ్చింది. వారు ఫైనల్‌కు చేరగలరని నమ్మకం కలిగింది.

2011: చెన్నైలో చితక్కొట్టబడిన కల

2011లో ఆర్సీబీ మళ్లీ ఫైనల్‌కు చేరుకుంది. ఈసారి చెన్నై సూపర్ కింగ్స్ (csk)తో చిదంబరం స్టేడియంలో తలపడింది. క్రిస్ గేల్ యొక్క విధ్వంసక బ్యాటింగ్‌తో (559 పరుగులు, సీజన్‌లో) ఆర్సీబీ ఫైనల్‌కు చేరినప్పటికీ.. సీఎస్‌కే బలమైన జట్టుగా ఉంది. సీఎస్‌కే మురళీ విజయ్ (95), మైఖేల్ హస్సీ (63) ల 159 రన్స్ ఓపెనింగ్ భాగస్వామ్యంతో 205/5 స్కోరు సాధించింది. ఆర్సీబీ బ్యాటింగ్ లైనప్ ఈ భారీ లక్ష్యం ముందు చిన్నబోయింది. గేల్ (0) మొదటి ఓవర్‌లోనే ఔట్ కావడంతో ఆర్సీబీ ఆశలు దెబ్బతిన్నాయి. సౌరభ్ తివారీ (42) పోరాడినప్పటికీ, ఆర్సీబీ 147/8 వద్ద ఆగిపోయింది. 58 రన్స్ తేడాతో ఓడిన ఈ మ్యాచ్ ఆర్సీబీ అభిమానులకు అతిపెద్ద నిరాశను మిగిల్చింది. చెన్నై యొక్క హోమ్ గ్రౌండ్‌లో సీఎస్‌కే ఆధిపత్యం ఆర్సీబీని విమర్శలతో ముంచెత్తింది.

2016: బెంగళూరులో గుండెను బద్దలు చేసిన ఓటమి

2016లో ఆర్సీబీ తమ హోమ్ గ్రౌండ్ ఎం. చిన్నస్వామి స్టేడియంలో సన్‌రైజర్స్ హైదరాబాద్ (SRH)తో ఫైనల్ ఆడింది. ఈ సీజన్‌లో విరాట్ కోహ్లీ (973 పరుగులు) అసాధారణ ఫామ్‌లో ఉన్నాడు. క్రిస్ గేల్, ఏబీ డివిలియర్స్ లాంటి స్టార్లతో ఆర్సీబీ ఫైనల్‌కు ఫేవరెట్‌గా బరిలోకి దిగింది. ఎస్‌ఆర్‌హెచ్ 208/7 స్కోరు చేసింది. డేవిడ్ వార్నర్ (69), యువరాజ్ సింగ్ (38) రాణించారు. ఆర్సీబీ ఛేజింగ్‌లో గేల్ (76), కోహ్లీ (54) 114 రన్స్ ఓపెనింగ్ భాగస్వామ్యంతో దూసుకెళ్లింది. కానీ ఇద్దరూ ఔట్ కావడంతో ఇన్నింగ్స్ కుప్పకూలింది. బెన్ కట్టింగ్ బౌలింగ్, ఫీల్డింగ్‌లో ఆర్సీబీని అడ్డుకున్నాడు. ఆర్సీబీ 200/7 వద్ద ఆగిపోయి, 8 రన్స్ తేడాతో ఓడిపోయింది. హోమ్ గ్రౌండ్‌లో ఈ ఓటమి అభిమానులకు గుండెలు పగిలే క్షణంగా గుర్తుండిపోయింది. అప్పటి నుంచి ప్రతి సీజన్లోనూ ఆర్సీబీ ఫైనల్ కు వెళ్లి కప్ గెలుస్తుందని ఎదురుచూసిన ఫ్యాన్స్ కు నిరాశే ఎదురైంది.

2025: అహ్మదాబాద్‌లో ట్రోఫీ కల నిజం

18 ఏళ్ల నిరీక్షణ తర్వాత.. 2025లో ఆర్సీబీ నరేంద్ర మోదీ స్టేడియంలో పంజాబ్ కింగ్స్‌తో తలపడింది. రజత్ పాటిదార్ నాయకత్వంలో ఆర్సీబీ 190/9 స్కోరు సాధించింది. విరాట్ కోహ్లీ (43) స్థిరంగా ఆడగా, జితేష్ శర్మ (24), లియామ్ లివింగ్‌స్టోన్ (25) కీలక ఇన్నింగ్స్‌లు ఆడారు. అయితే.. అర్ష్‌దీప్ సింగ్ బౌలింగ్‌తో ఆర్సీబీని డెత్ ఓవర్లలో కట్టడి చేశాడు. ఛేజింగ్‌లో పంజాబ్ 81/3 వద్ద ఉండగా, క్రునాల్ పాండ్యా జోష్ ఇంగ్లిస్ (39),షెఫర్డ్.. శ్రేయాస్ అయ్యర్ (1) వికెట్లను పడగొట్టి మ్యాచ్‌ను తమవైపుకు తిప్పారు. భువనేశ్వర్ కుమార్ యార్కర్లతో నెహాల్ వధేరా, మార్కస్ స్టోయినిస్ లను ఔట్ చేశాడు. చివరి ఓవర్‌లో శశాంక్ సింగ్ పోరాడినప్పటికీ, జోష్ హాజిల్‌వుడ్, యశ్ దయాల్ కట్టుదిట్టమైన బౌలింగ్‌తో పంజాబ్‌ను 184/7 వద్ద ఆపారు. 6 రన్స్ తేడాతో ఆర్సీబీ విజయం సాధించి, అభిమానుల కళ్లలో ఆనంద భాష్పాలను నింపింది. ఆర్సీబీ నాలుగు ఫైనల్స్‌లో మూడు ఓటములను (6 రన్స్, 58 రన్స్, 8 రన్స్) ఎదుర్కొని, చివరకు 2025లో 6 రన్స్ తేడాతో విజయం సాధించింది. ఈ జర్నీ ఆర్సీబీ అభిమానులకు ఒక రోలర్-కోస్టర్ రైడ్. ప్రతి ఓటమి వారిని బలపరిచింది.