IPL : ముంబై ఇంటికి..ప్లేఆఫ్స్‌కు రాజస్థాన్

దిశ, వెబ్ డెస్క్ : ఐపీఎల్ 2026 సీజన్‌లో రాజస్థాన్ రాయల్స్ (RR) జట్టు అధికారికంగా ప్లేఆఫ్స్ (Playoffs) బెర్తును ఖరారు చేసుకుంది. వాంఖడే స్టేడియం వేదికగా ముంబై ఇండియన్స్‌(MI)తో జరిగిన ఉత్కంఠభరిత పోరులో రాజస్థాన్ రాయల్స్ అద్భుతంగా రాణించి ఘన విజయం సాధించింది. ఈ మ్యాచ్‌లో మొదట బ్యాటింగ్ చేసిన రాజస్థాన్ జట్టు నిర్ణీత 20 ఓవర్లలో 8 వికెట్ల నష్టానికి 205 పరుగుల భారీ స్కోరును బోర్డుపై ఉంచింది. రాజస్థాన్ బ్యాటర్లలో ధ్రువ్ జురెల్ 38 పరుగులతో టాప్ స్కోరర్‌గా నిలవగా, ఆఖర్లో జొఫ్రా ఆర్చర్ (32), దాసున్ శనక (29) వేగంగా ఆడి జట్టుకు భారీ స్కోరు అందించారు. ముంబై ఇండియన్స్ బౌలర్లలో దీపక్ చాహర్, శార్దూల్ ఠాకూర్ చెరో రెండు వికెట్లు పడగొట్టగా, విల్ జాక్స్, అల్లా గజన్‌ఫర్, బాష్ తలో వికెట్ సాధించి రాజస్థాన్‌ను కట్టడి చేసేందుకు ప్రయత్నించారు.

అనంతరం 206 పరుగుల భారీ విజయలక్ష్యంతో బరిలోకి దిగిన ముంబై ఇండియన్స్ జట్టు, రాజస్థాన్ బౌలర్ల కట్టుదిట్టమైన వ్యూహాల ముందు తలవంచక తప్పలేదు. ముంబై స్టార్ బ్యాటర్ సూర్యకుమార్ యాదవ్ 60 పరుగులతో ఒంటరి పోరాటం చేసినప్పటికీ, అతనికి ఇతర బ్యాటర్ల నుంచి ఆశించిన స్థాయిలో మద్దతు లభించలేదు. కెప్టెన్ హార్దిక్ పాండ్య 34 రన్స్, విల్ జాక్స్ 33 రన్స్ చేసి కాసేపు క్రీజులో నిలిచినప్పటికీ, రన్‌రేట్ ఒత్తిడి పెరిగిపోవడంతో ముంబై నిర్ణీత 20 ఓవర్లలో 9 వికెట్లు కోల్పోయి 175 పరుగులకే పరిమితమైంది. రాజస్థాన్ రాయల్స్ బౌలర్లలో జొఫ్రా ఆర్చర్ అద్భుత స్పెల్‌తో 3 వికెట్లు పడగొట్టి ముంబై పతనాన్ని శాసించగా, యశ్ రాజ్, నాంద్రె బర్గర్, బ్రిజేశ్ శర్మ తలో రెండు వికెట్లతో అండగా నిలిచారు. ఈ అద్భుత విజయంతో రాజస్థాన్ రాయల్స్ ఈ సీజన్‌లో ప్లేఆఫ్స్‌కు చేరిన బలమైన జట్టుగా ఆవిర్భవించింది.