రాహుల్, స్టబ్స్ హాఫ్ సెంచరీలు.. ఉత్కంఠ పోరులో ఆర్సీబీపై ఢిల్లీ సూపర్ విక్టరీ!
ఎం.చిన్నస్వామి స్టేడియంలో అత్యంత ఉత్కంఠభరితంగా సాగిన ఈ పోరులో ఢిల్లీ క్యాపిటల్స్ 6 వికెట్ల తేడాతో ఆర్సీబీపై అద్భుత విజయాన్ని సాధించింది.
దిశ, డైనమిక్ బ్యూరో: ఐపీఎల్ 2026 సీజన్లో భాగంగా రాయల్ ఛాలెంజర్స్ బెంగళూరు (ఆర్సీబీ), ఢిల్లీ క్యాపిటల్స్ మధ్య జరిగిన మ్యాచ్ ప్రేక్షకులకు అసలైన టీ20 మజాను పంచింది. ఎం.చిన్నస్వామి స్టేడియంలో అత్యంత ఉత్కంఠభరితంగా సాగిన ఈ పోరులో ఢిల్లీ క్యాపిటల్స్ 6 వికెట్ల తేడాతో ఆర్సీబీపై అద్భుత విజయాన్ని సాధించింది. కేఎల్ రాహుల్, ట్రిస్టన్ స్టబ్స్ అర్ధ శతకాలకు తోడు.. చివర్లో డేవిడ్ మిల్లర్ తన వింటేజ్ ఆటతీరుతో చెలరేగడంతో ఢిల్లీని గెలుపు వరించింది.
మెరిసిన సాల్ట్.. తడబడిన ఆర్సీబీ మిడిలార్డర్
తొలుత బ్యాటింగ్ చేసిన బెంగళూరు నిర్ణీత 20 ఓవర్లలో 8 వికెట్ల నష్టానికి 175 పరుగులు చేసింది. ఓపెనర్ ఫిల్ సాల్ట్ (38 బంతుల్లో 63; 4 ఫోర్లు, 3 సిక్స్లు) అద్భుతమైన ఇన్నింగ్స్ ఆడాడు. సాల్ట్ దూకుడుతో ఆర్సీబీ 9 ఓవర్లకే 90/1 స్కోరుతో పటిష్ట స్థితిలో కనిపించింది. కానీ, ఆ తర్వాత ఢిల్లీ బౌలర్లు పుంజుకోవడంతో ఆర్సీబీ వరుసగా వికెట్లు కోల్పోయి ఊహించిన దాని కన్నా తక్కువ స్కోరుకే పరిమితమైంది. ఈ నేపథ్యంలోనే ఆర్సీబీ ప్లేయర్లు ఫిల్ సాల్ట్ (63), టిమ్ డేవిడ్ (26), విరాట్ కోహ్లీ (19), దేవదత్ పడిక్కల్ (18), జితేశ్ శర్మ (14), కృనాల్ పాండ్య (12), రజత్ పటిదార్ (8) పరుగులు సాధించారు. ఢిల్లీ బౌలింగ్ విషయంలో లుంగి ఎంగిడి (2), అక్షర్ పటేల్ (2), కుల్దీప్ యాదవ్ (2), ముకేశ్ కుమార్ (1) వికెట్లు తీశారు.
రాహుల్, స్టబ్స్ బాధ్యత.. మిల్లర్ ఫినిషింగ్ టచ్
176 పరుగుల లక్ష్య ఛేదనలో ఢిల్లీ క్యాపిటల్స్ 19.5 ఓవర్లలో 4 వికెట్లు కోల్పోయి విజయాన్ని అందుకుంది. ఛేదనలో కేఎల్ రాహుల్ (34 బంతుల్లో 57; 6 ఫోర్లు, 2 సిక్స్లు), ట్రిస్టన్ స్టబ్స్ (47 బంతుల్లో 60 నాటౌట్; 4 ఫోర్లు, 1 సిక్స్) బాధ్యతాయుతమైన హాఫ్ సెంచరీలతో జట్టును విజయపథంలో నడిపించారు. వీరికి తోడుగా అక్షర్ పటేల్ (19 బంతుల్లో 26; 3 ఫోర్లు) రాణించి రిటైర్డ్ హర్ట్గా వెనుదిరిగాడు. చివరి ఓవర్లలో మ్యాచ్ తీవ్ర ఉత్కంఠగా మారిన దశలో క్రీజులోకి వచ్చిన డేవిడ్ మిల్లర్ (10 బంతుల్లో 22 నాటౌట్; 1 ఫోర్, 2 సిక్స్లు) తన అనుభవాన్నంతా రంగరించాడు. ఆఖరి ఓవర్లో విరుచుకుపడి రెండు కళ్లు చెదిరే సిక్సర్లు, ఫోర్లతో ఢిల్లీ క్యాపిటల్స్కు చిరస్మరణీయ విజయాన్ని అందించాడు. ఆర్సీబీ బౌలింగ్ విషయంలో భువనేశ్వర్ కుమార్ (3), కృనాల్ పాండ్య (1) వికెట్ మాత్రమే పడగొట్టారు. మిగతా బౌలర్లు ఢిల్లీ బ్యాటర్లను నిలువరించలేకపోయారు.
