వైభవ్ సూర్యవంశీ ఆటతీరుకు పాట్ కమిన్స్ ఫిదా.. పెద్ద స్టార్ అవుతాడని కితాబు

దిశ, వెబ్‌డెస్క్: ఆస్ట్రేలియా క్రికెట్ జట్టు కెప్టెన్ పాట్ కమిన్స్ తన కొత్త ఫేవరెట్ క్రికెటర్ గురించి ఆసక్తికర వ్యాఖ్యలు చేశారు. భారత్‌కు చెందిన యువ సంచలనం వైభవ్ సూర్యవంశీ ఆటతీరుకు తాను ఫిదా అయ్యానని, ప్రస్తుతం అతడే తన ఫేవరెట్ ప్లేయర్ అని కమిన్స్ పేర్కొన్నారు. ఇంత చిన్న వయసులో వైభవ్ చూపిస్తున్న పరిణతి, షాట్ సెలక్షన్ అద్భుతమని కొనియాడారు. "వైభవ్ సూర్యవంశీ నా కొత్త ఫేవరెట్ ప్లేయర్. 15 ఏళ్ల వయసులో అతడు ఆడుతున్న విధానం చూస్తుంటే ఆశ్చర్యంగా ఉంది. అంత చిన్న వయసులో అంతటి ఒత్తిడిని తట్టుకుని, అంతర్జాతీయ స్థాయి బౌలర్లను ఎదుర్కోవడం సామాన్యం కాదు. అతడిలో గొప్ప ప్రతిభ ఉంది. భవిష్యత్తులో అతడు పెద్ద స్టార్ అవుతాడు" అని కమిన్స్ ప్రశంసించారు.

వైభవ్ సూర్యవంశీ రికార్డులు..

కేవలం 13 ఏళ్ల వయసులోనే ఐపీఎల్ వేలంలోకి వచ్చి, రాజస్థాన్ రాయల్స్ జట్టుకు భారీ ధర (రూ. 1.10 కోట్లు)కు అమ్ముడై చరిత్ర సృష్టించాడు. బిహార్ తరఫున రంజీ ట్రోఫీలో అరంగేట్రం చేసి, అతి పిన్న వయసులో ఫస్ట్ క్లాస్ క్రికెట్ ఆడిన ఆటగాడిగా నిలిచాడు. అండర్-19 టెస్టులో ఆస్ట్రేలియాపై కేవలం 58 బంతుల్లోనే సెంచరీ బాది అందరి దృష్టిని ఆకర్షించాడు. పాట్ కమిన్స్ లాంటి మేటి బౌలర్, కెప్టెన్ నుండి ఇలాంటి ప్రశంసలు దక్కడం వైభవ్ సూర్యవంశీ కెరీర్‌కు పెద్ద బూస్ట్ అని చెప్పవచ్చు. కమిన్స్‌తో పాటు ఇప్పటికే పలువురు మాజీ క్రికెటర్లు వైభవ్‌ను 'నెక్స్ట్ బిగ్ థింగ్ ఇన్ ఇండియన్ క్రికెట్' అని అభివర్ణిస్తున్నారు.