IPL 2026: ‘డూ ఆర్ డై’ పోరు.. టాస్ గెలిచిన పంజాబ్ కింగ్స్

దిశ, వెబ్‌డెస్క్: ఐపీఎల్ 2026 సీజన్‌లో ప్లేఆఫ్స్ రేసులో నిలవడమే లక్ష్యంగా పంజాబ్ కింగ్స్ (PBKS) జట్టు అత్యంత కీలకమైన సమరానికి సిద్ధమైంది. లక్నోలోని అటల్ బిహారీ వాజ్‌పేయి ఏకానా క్రికెట్ స్టేడియం వేదికగా లక్నో సూపర్ జయంట్స్ (LSG)తో జరుగుతున్న ఈ లీగ్ మ్యాచ్‌లో పంజాబ్ కింగ్స్ కెప్టెన్ శ్రేయాస్ అయ్యర్ టాస్ గెలిచాడు. ఇక్కడి పిచ్ పరిస్థితులను బట్టి ఆయన మొదటగా బౌలింగ్ ఎంచుకుని, లక్నో జట్టును బ్యాటింగ్‌కు ఆహ్వానించాడు. ఈ మ్యాచ్ పంజాబ్ కింగ్స్ జట్టుకు ‘చావో రేవో’ లాంటిది. టోర్నీలో వరుస ఓటములతో సతమతమవుతున్న పంజాబ్, ప్లేఆఫ్స్ ఆశలు సజీవంగా ఉంచుకోవాలంటే ఈ మ్యాచ్‌లో ఖచ్చితంగా గెలిచి తీరాల్సిందే. ఒకవేళ ఈ మ్యాచ్‌లో గనుక ఓడిపోతే, పంజాబ్ కింగ్స్ ప్లేఆఫ్స్ రేసు నుంచి అధికారికంగా తప్పుకోవాల్సి వస్తుంది.

మరోవైపు, హోమ్ టీమ్ అయిన లక్నో సూపర్ జయంట్స్ ఈ సీజన్‌లో పేలవ ప్రదర్శన కారణంగా ఇప్పటికే ఐపీఎల్ ప్లేఆఫ్స్ రేసు నుంచి పూర్తిగా తప్పుకుంది. అయితే, తమ సొంత మైదానంలో జరుగుతున్న చివరి మ్యాచ్ కావడంతో, పంజాబ్ కింగ్స్ అవకాశాలను దెబ్బతీసి, గెలుపుతో టోర్నీని గౌరవప్రదంగా ముగించాలని లక్నో భావిస్తోంది. ఒత్తిడి అంతా పంజాబ్ జట్టుపైనే ఉన్న నేపథ్యంలో శ్రేయాస్ అయ్యర్ సేన ఈ చారిత్రాత్మక మైదానంలో ఎలాంటి ప్రదర్శన చేస్తుందో చూడాలి.