ఈడెన్ గార్డెన్స్‌లో సన్‌రైజర్స్ పరుగుల వరద.. కేకేఆర్ ముందు భారీ టార్గెట్!

దిశ, వెబ్‌డెస్క్: ఐపీఎల్ 2026 సీజన్‌లో సన్‌రైజర్స్ హైదరాబాద్ (SRH) బ్యాటర్లు తమ ప్రతాపాన్ని చూపించారు. కోల్‌కతాలోని ఈడెన్ గార్డెన్స్ మైదానంలో కోల్‌కతా నైట్ రైడర్స్(KKR)తో జరుగుతున్న మ్యాచ్‌లో హైదరాబాద్ బ్యాటర్లు సిక్సర్లు, ఫోర్లతో విరుచుకుపడ్డారు. టాస్ ఓడి మొదట బ్యాటింగ్‌కు దిగిన ఆరెంజ్ ఆర్మీ నిర్ణీత 20 ఓవర్లలో ఎనిమిది వికెట్లు కోల్పోయి 226 పరుగుల భారీ స్కోరు సాధించి, కేకేఆర్ ముందు కొండంత లక్ష్యాన్ని ఉంచింది. ఇన్నింగ్స్ ఆరంభం నుంచే సన్‌రైజర్స్ ఓపెనర్లు అభిషేక్ శర్మ, ట్రావిస్ హెడ్ ప్రత్యర్థి బౌలర్లపై ఎదురుదాడికి దిగారు. పవర్‌ప్లేను అద్భుతంగా వినియోగించుకున్న ఈ జోడి, మైదానం నలుమూలలా బౌండరీల వర్షం కురిపించింది. వీరిద్దరూ ఇచ్చిన మెరుపు ఆరంభంతో హైదరాబాద్ స్కోరు బోర్డు పరుగులు పెట్టింది. ఆ తర్వాత కూడా పరుగుల వేగం తగ్గకుండా హెన్రిచ్ క్లాసెన్ హాఫ్ సెంచరీతో రాణించారు. నితీష్ కుమార్ రెడ్డి కూడా పర్వాలేదని పించారు. వీరిద్దరి మెరుపులతో సన్‌రైజర్స్ నిర్ణీత 20 ఓవర్లలో భారీ స్కోరును బోర్డుపై ఉంచగలిగింది. 227 పరుగుల విజయ లక్ష్యంతో బరిలోకి దిగుతున్న కోల్‌కతా నైట్ రైడర్స్.. హైదరాబాద్ బౌలింగ్‌ను ఎలా ఎదుర్కొంటుందో చూడాలి. కోల్‌కతా బౌలర్లలో ముజరబాని నాలుగు వికెట్లు, వైభవ్ రెండు వికెట్లు తీయగా, త్యాగి, అనుకుల్ చెరో వికెట్ తీశారు.