ఓటములతో అల్లాడుతున్న చెన్నై.. నేడైన ఖాతా తెరిచేనా?
ఐపీఎల్ 2026 సీజన్లో భాగంగా ఆదివారం రాత్రి క్రికెట్ అభిమానులు ఎప్పుడెప్పుడా అని ఎదురుచూస్తున్న ఒక రసవత్తర పోరు జరగబోతోంది.
దిశ, వెబ్ డెస్క్ : ఐపీఎల్ 2026 సీజన్లో భాగంగా ఆదివారం రాత్రి క్రికెట్ అభిమానులు ఎప్పుడెప్పుడా అని ఎదురుచూస్తున్న ఒక రసవత్తర పోరు జరగబోతోంది. గత ఏడాది తీవ్ర వైఫల్యాలను కంటిన్యూ చేస్తూ.. ఈ సీజన్ తొలి రెండు మ్యాచ్ల్లోనూ చెన్నై సూపర్ కింగ్స్ (CSK) ఘోర పరాజయాలు చవిచూసిన సంగతి తెలిసిందే. కాగా నేడు రాయల్ ఛాలెంజర్స్ బెంగళూరు (RCB)తో జరగనున్న మూడో మ్యాచ్తోనైనా విజయాల ఖాతా తెరవాలని పట్టుదలగా ఉంది. ఈ సీజన్ను కూడా ఘనవిజయంతో ఆరంభించిన డిఫెండింగ్ ఛాంపియన్ RCB తో తలపడటం చెన్నైకి పెద్ద సవాలుగానే మారనుంది.
చెన్నై జట్టు వైఫల్యాలను విశ్లేషిస్తే.. తొలి మ్యాచ్లో బ్యాటింగ్ ఆర్డర్ కుప్పకూలగా, రెండో మ్యాచ్లో బౌలర్లు దారుణంగా పరుగులు సమర్పించుకోవడంతో ఓటమి తప్పలేదు. ముఖ్యంగా కెప్టెన్ రుతురాజ్ గైక్వాడ్ అటు బ్యాటర్గా, ఇటు కెప్టెన్గా తీవ్ర ఒత్తిడిలో కనిపిస్తున్నాడు. జట్టును ముందుండి నడిపించాల్సిన బాధ్యత ఇప్పుడు ఆయనపై ఉంది. బ్యాటింగ్ విభాగంలో మాత్రే, శివమ్ దూబే, సర్ఫరాజ్ ఖాన్ ఫామ్లో ఉండటం జట్టుకు సానుకూలాంశం. కాగా, సంజు శాంసన్ ఈ మ్యాచ్లోనైనా భారీ ఇన్నింగ్స్ ఆడకపోతే చెన్నైకి కష్టాలు తప్పవు. బౌలింగ్ విభాగం కూడా ఆర్సీబీ వంటి పటిష్టమైన బ్యాటింగ్ లైనప్ను ఎదుర్కోవడానికి బలంగా పుంజుకోవాల్సిన అవసరం ఎంతైనా ఉంది.
మరోవైపు ఆర్సీబీ జట్టు అత్యంత బలంగా కనిపిస్తోంది. విరాట్ కోహ్లీ, ఫిల్ సాల్ట్, దేవదత్ పడిక్కల్, రజత్ పాటీదార్, జితేష్ శర్మ. టిమ్ డేవిడ్లతో కూడిన వారి బ్యాటింగ్ విభాగం ఏ బౌలింగ్ దళానికైనా సింహస్వప్నమే. బౌలింగ్లో కూడా డఫీ, భువనేశ్వర్ కుమార్, సుయాష్ శర్మలు మెరుగ్గా రాణిస్తుండటం ఆ జట్టుకు అదనపు బలాన్ని ఇస్తోంది. డిఫెండింగ్ ఛాంపియన్గా తమ ఆధిపత్యాన్ని చాటుకోవాలని బెంగళూరు చూస్తుంటే, పరువు నిలుపుకోవడానికి చెన్నై పోరాడాల్సి ఉంది. మరి ఈ రాత్రి జరిగే హై-వోల్టేజ్ మ్యాచ్లో చెన్నై గెలిచి మళ్లీ పుంజుకుంటుందా? లేక ఆర్సీబీ తన విజయ పరంపరను కొనసాగిస్తుందా? అనేది వేచి చూడాల్సిందే.
