స్మార్ట్ఫోన్ మీ స్పెర్మ్ క్వాలిటీని దెబ్బతీస్తోందా.. తాజా పరిశోధనలో షాకింగ్ విషయాలు
ఫోన్ రేడియేషన్ మరియు ల్యాప్టాప్ వేడి వల్ల పురుషుల్లో వీర్యకణాల నాణ్యత తగ్గే ప్రమాదం ఉందని పరిశోధనలు హెచ్చరిస్తున్నాయి. తగిన జాగ్రత్తలు తప్పనిసరి!
దిశ, వెబ్ డెస్క్: నేటి సమాజంలో వివిధ కారణాల వల్ల మగవారిలో స్పెర్మ్ క్వాలిటీ తగ్గి సంతానోత్పత్తి సమస్యలు ఎదుర్కొంటున్నారు. దీంతో దంపతులు ఫెర్టిలిటీ సెంటర్ల చుట్టూ తిరగాల్సిన పరిస్థితులు ఏర్పడుతున్నాయి. పురుషుల్లో స్పెర్మ్ క్వాలిటీ తగ్గడానికి స్మార్ట్ఫోన్లు, ల్యాప్టాప్ల వినియోగం కూడా ఓ కారణంగా తెలుస్తోంది. ఇవి పురుషుల పునరుత్పత్తి ఆరోగ్యం పై చూపే ప్రభావం గురించి వస్తున్న పరిశోధనలు ఆందోళన కలిగిస్తున్నాయి.
రేడియేషన్- స్పెర్మ్ ఆరోగ్యం
స్మార్ట్ఫోన్లు పనిచేసేటప్పుడు అవి రేడియో ఫ్రీక్వెన్సీ ఎలక్ట్రోమాగ్నెటిక్ రేడియేషన్ (RF-EMR)ను విడుదల చేస్తాయి. పురుషులు తమ ఫోన్ను ప్యాంట్ ఫ్రంట్ పాకెట్లో ఉంచుకున్నప్పుడు, అది పునరుత్పత్తి అవయవాలకు చాలా దగ్గరగా ఉంటుంది. పలు పరిశోధనల ప్రకారం.. ఈ రేడియేషన్ ప్రభావం వల్ల వీర్యకణాల కదలిక (Motility), వాటి సంఖ్య (Count), జీవశక్తి (Viability) తగ్గే అవకాశం ఉంది. అంతేకాకుండా, రేడియేషన్ వల్ల వీర్యకణాల్లో 'ఆక్సిడేటివ్ స్ట్రెస్' ఏర్పడి DNA దెబ్బతినే ప్రమాదం కూడా ఉంటుందని శాస్త్రవేత్తలు హెచ్చరిస్తున్నారు.
ఉష్ణోగ్రత (Heat) చూపే ప్రభావం
పురుషుల వృషణాలు సాధారణ శరీర ఉష్ణోగ్రత కంటే సుమారు 2 నుంచి 4 డిగ్రీల సెల్సియస్ తక్కువ ఉష్ణోగ్రత వద్ద ఉన్నప్పుడే ఆరోగ్యకరమైన వీర్యకణాలను ఉత్పత్తి చేయగలవు. ఫోన్ నిరంతరం జేబులో ఉండటం వల్ల, ముఖ్యంగా ఫోన్ వాడేటప్పుడు, చార్జింగ్ అయ్యేటప్పుడు వెలువడే వేడి ఈ ఉష్ణోగ్రతను పెంచుతుంది. ఇలా అసాధారణంగా ఉష్ణోగ్రత పెరగడాన్ని 'స్క్రోటల్ హైపర్థెర్మియా' అంటారు. ఇది వీర్యకణాల ఉత్పత్తి ప్రక్రియకు అంతరాయం కలిగించి, నాణ్యత లేని కణాలు ఉత్పత్తి కావడానికి కారణమవుతుంది.
ల్యాప్టాప్ వినియోగం - జాగ్రత్తలు
పేరుకు 'ల్యాప్టాప్' (ఒళ్లో పెట్టుకునేది) అయినా, వాటిని నేరుగా ఒళ్లో పెట్టుకుని వాడటం మరింత ప్రమాదకరమని నిపుణులు చెబుతున్నారు. ల్యాప్టాప్లు పనిచేసేటప్పుడు వెలువడే వేడి, లోపలి సర్క్యూట్ల నుంచి వచ్చే ఎలక్ట్రోమాగ్నెటిక్ ఫీల్డ్స్, వై-ఫై రేడియేషన్ అన్నీ కలిసి పురుషుల సంతానోత్పత్తి సామర్థ్యం పై ప్రతికూల ప్రభావం చూపుతాయి. కేవలం 30 నిమిషాల పాటు ల్యాప్టాప్ను ఒళ్లో ఉంచుకోవడం వల్ల వృషణాల వద్ద ఉష్ణోగ్రత గణనీయంగా పెరుగుతుందని అధ్యయనాలు నిరూపించాయి. అందుకే ల్యాప్టాప్ను టేబుల్పై ఉంచి లేదా కూలింగ్ ప్యాడ్ ఉపయోగించి వాడటం శ్రేయస్కరమని నిపుణులు సూచిస్తున్నారు. అలాగే సెల్ ఫోన్లను టైట్ గా ఉండే జీన్స్ పాయింట్ల ఫ్రంట్ జేబులో పెట్టుకోవద్దని డాక్టర్లు సైతం సూచిస్తున్నారు.
