ద్రవిడ రాజకీయ చైతన్యం.. తెలుగు నేలపై రాదా?
తమిళనాడులో రాజకీయ విజయాల వెనుక ఉన్న సిద్ధాంత బలం, ద్రవిడ చైతన్యం, యువత పాత్రను విశ్లేషిస్తూ, తెలుగు రాష్ట్రాల్లో అలాంటి మార్పులు ఎందుకు సాధ్యం కావడం లేదో ఈ వ్యాసం లోతుగా పరిశీలిస్తుంది.
తమిళనాడు రాజకీయ యవనికపై 'తమిళగ వెట్రి కళగం' (TVK) పార్టీతో విజయ్ సాధించిన స్పందన ఒక నవ శకానికి నాంది పలికింది. అయితే ఇటువంటి ప్రయోగాలు లేదా మార్పులు తెలుగు రాష్ట్రాల్లో ఎందుకు విజయవంతం కావడం లేదనేది ఒక పెద్ద ప్రశ్న.
తమిళనాడులో సినిమా గ్లామర్ వెనుక ఒక బలమైన సామాజిక సిద్ధాంతం ఉంటుంది. ఎం.జి.ఆర్ నుంచి విజయ్ వరకు ప్రతి ఒక్కరూ ద్రవిడ అస్తిత్వాన్ని తమ రాజకీయ పునాదిగా చేసుకున్నారు. కానీ తెలుగు రాజ కీయాల్లో సిద్ధాంతం కంటే వ్యక్తిగత ఆరాధన, కుల సమీకరణలే రాజ్యమేలుతున్నాయి. ఇక్కడ నాయకుడు తన సొంత ఇమేజ్పైనే ఎక్కువగా ఆధారపడుతున్నాడు..
అస్తిత్వ చైతన్యం - తమిళ వర్సెస్ తెలుగు..
తమిళ ఓటరు తన భాషను, సంస్కృతిని ఒక రాజకీయ ఆయుధంగా చూస్తాడు. రాష్ట్ర ప్రయోజనాల విషయంలో వారు పార్టీలకు అతీతంగా ఏకమవుతారు.. కానీ తెలుగు రాష్ట్రాల్లో ప్రాంతీయ ఆత్మగౌరవం అనే అంశం కేవలం ఎన్నికల నినాదాలకే పరిమితం అవుతోంది. తమిళనాడులో పెరియార్ ప్రారంభించిన సామాజిక సంస్కరణలు ప్రజల ఆలోచనా విధానాన్ని మార్చేశాయి. అక్కడ ఓటరు ఒక నాయకుడిని ఎంచుకునేటప్పుడు ఆ నాయకుడు ద్రవిడ సిద్ధాంతాలకు ఎంత కట్టుబడి ఉన్నాడనేది చూస్తాడు. తెలుగు నేలపై అటువంటి బలమైన సామాజిక ఉద్యమాలు గత కొన్ని దశాబ్దాలుగా జరగలేదు.. దీనివల్ల ఓటర్లు కేవలం సంక్షేమ పథకాలు లేదా తక్షణ లబ్ధి వైపే మొగ్గు చూపు తున్నారు. భాషా సంస్కృతుల చుట్టూ రాజకీయ అస్తిత్వాన్ని నిర్మించుకోవడంలో తెలుగు జనం వెనుకబడి ఉండడం వల్ల జాతీయ పార్టీల ప్రభావం ఇక్కడ ఎక్కువగా ఉంటోంది.
జెన్-జీల రాజకీయ అయోమయం..
నేటి యువతకు డిజిటల్ విప్లవం వల్ల ప్రపంచ జ్ఞానం పెరిగినప్పటికీ తెలుగు రాష్ట్రాల్లో యువత ఎక్కువగా కుల సంఘాల చుట్టూ లేదా హీరోల అభిమాన సంఘాల చుట్టూ కేంద్రీకృతమై ఉంది. విజయ్ తమిళనాడులో తన అభిమాన సంఘాలను సామాజిక సేవా విభాగాలుగా మార్చి ఒక వ్యవస్థను నిర్మించారు. తెలుగు హీరోలు రాజకీయాల్లోకి వస్తున్నప్పుడు వారి అభిమానుల బలం కేవలం ఆవేశానికే పరిమితం అవుతోంది. జెన్-జీ ఓటర్లు మార్పు కోరుకుంటున్నప్పటికీ వారికి సరైన ప్రత్యామ్నా యం దొరకడం లేదు. దీంతో వారు మళ్లీ పాత పార్టీల మధ్యే తమ ఓటును పంచుకోవాల్సి వస్తోంది. డిజిటల్ యుగంలో పుట్టిన యువత వ్యవస్థలో సమూల మార్పులు కోరుకుంటున్నారు. కానీ నాయకులు మాత్రం వారిని కేవలం ఓటు బ్యాంకుగా చూస్తూ చిన్న చిన్న రాయితీలతో సరిపెడుతున్నారు.
కుల రాజకీయాల ప్రబల ప్రభావం..
తెలుగు రాజకీయాల్లో కులం అనేది ఒక నిర్ణయాత్మక శక్తి. అభ్యర్థుల ఎంపిక నుంచి ఓటర్ల తీర్పు వరకు ప్రతిదీ కుల సమీకరణల చుట్టూనే తిరుగుతుంది. తమిళనాడులో కుల ప్రభావం ఉన్నప్పటికీ అది ద్రవిడ అస్తిత్వం అనే పెద్ద గొడుగు కింద అణగి ఉంటుంది. తెలుగు రాష్ట్రాల్లో మాత్రం రాజకీయ పార్టీలే కులాలను విడదీసి ఓటు బ్యాంకు రాజకీయాలు చేస్తున్నాయి. సామాజిక సంస్క రణల గురించి మాట్లాడే నాయకుల కంటే తమ కులం గురించి మాట్లాడే నాయకులకే ఇక్కడ ఆదరణ లభిస్తోంది. రాజకీయాల్లో సామాజిక న్యాయం అంటే కేవలం కొన్ని పదవుల పంపకం మాత్రమే కాదు, అది ఆలోచనా విధానంలో మార్పు అని ప్రజలు గుర్తించలేకపోతున్నారు.
ఎన్నికల వ్యయం - ఓటరు కొనుగోలు..
తెలుగు రాష్ట్రాల్లో ఎన్నికల నిర్వహణ ఒక వ్యాపారంగా మారిపోయింది. ఓటుకు నోటు ఇచ్చే సంస్కృతి ఇక్కడ వేళ్లూనుకుపోయింది. తమిళనాడులోనూ ఈ సమస్య ఉన్నప్పటికీ అక్కడ ఓటరు నిర్ణయం తీసుకోవడంలో సిద్ధాంతం కూడా కొంత పాత్ర పోషిస్తుంది. తెలుగు ఓటర్లు చాలా వరకు అభివృద్ధి అంటే రోడ్లు లేదా భవనాలు మాత్రమే అని భావించడం వల్ల సామాజిక మార్పు అనే అంశం వెనుకబడిపోయింది. ఓటరులో చైతన్యం రానంత వరకు ఇక్కడ విజయ్ తరహా విప్లవాత్మక మార్పులు రావడం అసాధ్యం.
నాయకత్వ లోపం - విజన్ కొరత!
తమిళనాడులో విజయ్ తన మేనిఫెస్టోలో లౌకికవాదం, సామాజిక న్యాయం గురించి స్పష్టమైన హామీలు ఇచ్చారు. ఆయన ఒక దీర్ఘకాలిక విజన్తో రాజకీయాల్లోకి వచ్చారు. తెలుగు రాష్ట్రాల్లో కొత్తగా వచ్చే నాయకులు కేవలం పాత పార్టీలను తిట్టడానికే తమ సమయాన్ని కేటాయిస్తున్నారు. ప్రజలకు ఒక కొత్త ఆశను లేదా కొత్త మార్గాన్ని చూపించడంలో వారు విఫలం అవుతున్నారు.. విద్యావంతులైన యువత రాజకీయాల్లోకి రాకపోవడం, వచ్చిన వారు కూడా పాత పద్ధతులనే అనుసరించడం వల్ల కొత్త రాజకీయ శకానికి ఆస్కారం లేకుండా పోతోంది. నాయకత్వం అంటే కేవలం ప్రసంగాలు చేయడం కాదు, ప్రజల ఆశయాలకు ఒక రూపం ఇవ్వడం అని నేటి రాజకీయాలు మర్చిపోయాయి.
తెలుగు ఓటర్లలో ఈ స్పృహ పెరగాలి..!
తెలుగు నేలపై ఒక రాజకీయ విప్లవం రావాలంటే అది కేవలం ఒక హీరో లేదా ఒక వ్యక్తి వల్ల సాధ్యం కాదు. ప్రజల ఆలోచనా విధానంలో మార్పు రావాలి. కులం కంటే రాష్ట్ర ప్రయోజనం, ఉచితాల కంటే ఉపాధి అవ కాశాలు ముఖ్యం అనే స్పృహ ఓటర్లలో కలగాలి. తమిళ ఓటర్లు తమ భాషా సంస్కృతుల పట్ల చూపే గౌరవం తెలుగు ఓటర్లలో కూడా పెరగాలి. ఓటు అనేది ఒక బాధ్యత అని, అది అమ్మకానికి కాదని ప్రజలు గుర్తించినప్పుడే తెలుగు గడ్డపై కూడా ద్రవిడ కోట తరహా రాజకీయ చైతన్యం వెల్లివిరుస్తుంది. అప్పటివరకు ఇక్కడ రాజ కీయాలు కేవలం వ్యక్తుల చుట్టూ, కులాల చుట్టూ తిరుగుతూనే ఉంటాయి. సిద్ధాంత బలం లేని రాజకీయం ఎప్పుడూ ఒక వ్యక్తిగత ప్రయోజనాల వేదికగానే మిగిలిపోతుంది. ఆ మార్పు తెలుగు జనం నుంచే మొదలవ్వాలి.
- డా. కట్కూరి,
పాలసీ విశ్లేషకుడు.
80192 01820
