మహిళ అభ్యున్నతే సమాజాభివృద్ధి!

కేంద్ర, రాష్ట్ర ప్రభుత్వాలు మహిళా సాధికారతను ప్రోత్సహించడానికి అనేక కార్యక్రమాలను చేపట్టింది. 'బేటీ బచావో, బేటీ పఢావో' వంటి పథకాలు బాలికా విద్యను ప్రోత్సహించడమే కాకుండా, లింగ వివక్షను తగ్గించడానికి కృషి చేస్తున్నాయి. మహిళా రిజర్వేషన్ బిల్లు చట్టసభలలో మహిళలకు 33% రిజర్వేషన్లు కల్పించడం ద్వారా రాజకీయ రంగంలో మహిళల భాగస్వామ్యాన్ని పెంచడానికి ఉద్దేశించబడింది.

చిన్న తరహా పరిశ్రమల ద్వారా..

విద్య మహిళా సాధికారతకు పునాది. నేడు, భారత దేశంలో బాలికల అక్షరాస్యత రేటు గణనీయంగా పెరిగింది. ఉన్నత విద్యలోనూ మహిళలు పురుషులతో సమానంగా రాణిస్తున్నారు. ఆర్థిక సాధికారత కూడా మహిళల జీవితాల్లో మార్పులు తీసుకొస్తుంది. స్వయం సహాయక బృందాలు, చిన్న తరహా పరిశ్రమల ద్వారా మహిళలు ఆర్థికంగా స్వతంత్రంగా మారుతున్నారు. సాంకేతిక రంగం లోనూ మహిళలు ప్రముఖ స్థానాన్ని ఏర్పరచుకుంటున్నారు. సాఫ్ట్‌వేర్, ఆర్టిఫిషియల్ ఇంటెలిజెన్స్, బయోటెక్నాలజీ, డేటా సైన్స్ వంటి విభాగాల్లో భారతీయ మహిళలు ప్రముఖ సంస్థల్లో నాయకత్వం వహిస్తున్నారు.

సవాళ్లు... గమ్యం

అయితే, మహిళా సాధికారత సాధనలో ఇంకా అనేక సవాళ్లు ఉన్నాయి. లింగ వివక్ష, గృహ హింస, బాల్య వివాహాలు, వరకట్నం వంటి దురాచారాలు ఇప్పటికీ సమాజంలో పాతుకుపోయి ఉన్నాయి. పని ప్రదేశాల్లో మహిళలపై లైంగిక వేధింపులు, వేతన వివక్ష వంటి సమస్యలను ఎదుర్కొంటున్నారు. రాజకీయ రంగంలో మహిళల భాగస్వామ్యం ఇంకా ఆశించిన స్థాయిలో లేదు. మహిళా సాధికారతను సాధించడానికి ప్రభుత్వం, పౌర సమాజం ప్రతి ఒక్కరూ కలిసి కృషి చేయాలి. చట్టాలను కఠినంగా అమలు చేయడంతో పాటు, సామాజిక దృక్పథంలో మార్పు తీసుకురావాలి. మహిళలకు నాణ్యమైన విద్య, ఉపాధి అవకాశాలు కల్పించాలి. మహిళల భద్రతకు ప్రాధాన్యత ఇవ్వాలి. భారతదేశం మహిళా సాధికారత దిశగా సరైన మార్గంలో పయనిస్తోంది. మహిళలు తమ పూర్తి సామర్థ్యాన్ని వెలికితీసినప్పుడే దేశం నిజమైన అభివృద్ధిని సాధిస్తుంది. మహిళా సాధికారత అనేది కేవలం మహిళల హక్కు మాత్రమే కాదు, ఇది దేశ భవిష్యత్తుకు పెట్టుబడి.

మహేశ్వరం భాగ్యలక్ష్మి

అసిస్టెంట్ ప్రొఫెసర్

9505618252